南京人眼中香港

『去了一趟香港，被香港毒倒了，香港的色彩很舒服，不干涩不油腻，刚刚好，难道是传说中的德味？到了香港发现自己是彻头彻尾一穷人，满街跑的都是超级房车，满眼晃的都是大牌旗舰铺，连中学生手上的名表都那么晃眼。咱不跟他们比，精神上发点小财就知足了。

香港人很友好，虽然看起来不太热情，但往往你在街头彷徨的时候，一个香港老太会过来给你指路。不过感觉香港对内地的了解不多，对内地客不太重视。香港的网络与内地互联似乎有问题，内地网友与香港网友交流甚少，后来听一香港媒体的老师介绍，香港网络普及率奇高，但香港人很忙，泡网的不多，也没有像天涯，西祠这样的大型论坛，所以香港的网民比较像游牧人，呵呵，不知道是不是这样。当然自己亲自去香港，才能真正了解香港，香港的效率，尤其是交通效率让我惊叹，几乎都是2车道，单行线众多，却很少堵车，车速飞快，行人不会出现在快车道上，几乎没有自行车，摩托车与汽车共用一道。街道干净，50米一个垃圾桶。行人走路很快，我一停下来拍照就会阻碍行人疾走，很不好意思。天空和海水很蓝，虽然香港人说现在香港的空气很差，但是摆在南京，估计是很好的空气了。』




簡體字？唔需要奇怪，因以上文章乃轉貼自網站：色影無忌，原文加原作者是次照片作品，可按此 連結 ，本人睇完此文後，我會開始反省一下，對內地人多點重視，因為不應受尊重的只佔少部份，反正世界各國都存在，內地人實不應再被標籤化，而大多數問題都是源自大家文化背景差異，生活習慣所產生罷了......

早日康復

癲豆先生/太太於九月尾探過奀豬，當時奀豬傷口仍有痛楚，導至只能裂開小口微笑，並未能開懷大笑，但精神好好，全程有講有微笑，但當日因未出報告，所以未知病情進展。

10月8日，釘歷史去探過奀豬，好精神，進展良好，報告已出：肝臟壞組織已消除，但手術之前已有壞細胞混入血液當中，所以仍會有復發機會(有機會感染其他器官)。

現在奀豬極需要休養，適時作息、不能操勞、戒口等等，本人在此呼籲各方好友，如奀豬日後返工的話，請儘量調啲朝九晚五，唔洗操勞嘅更比佢，例如10仔，大家夾手夾腳睇住佢，幫佢休養成功後，再為大家拼搏過吖！

最後，開呢個 Post 嘅目的除咗匯報奀豬進展外，更希望大家多一個地方留言比奀豬，當然更鼓勵你直接打電話或去探探佢啦！

健康金字塔

做完手術後，對飲食開始多點注意，送比大家一個可能遺忘已久嘅食物金字塔。

祝願各位 平平安安！ 健健康康！生活愉快每一天！

手術成功

7月19日，上午11點，到達舊山頂道1號嘉諾撒醫院，因為是下午3點才安排做手術，所以兩點前預備妥當(消毒水沖涼及換上手術服)在病床等候就可以，一辦完入院手續，到床位放低物品後，即落樓四處行下，整間醫院較舊，房租包膳食，地下有兩間餐廳，好貴但有幾台電腦可供上網，有些房間更設有WiFi服務，我住嗰間就冇嘞，因為最平嘛，另外各房間都有電視睇，電動床，召喚鐘等等，姑娘幾好人兼盡責，喺度要多謝佢哋嘅照顧，呢次發覺原來照顧病人要有好大嘅忍耐力先得，醫護工作真係好辛苦！

今次有兩個驚喜，都係主診比我嘅：
第一個係12點幾當我在醫院週圍行緊嘅時候，收到姑娘電話，內容係手術時間改咗下午兩點做，要立即上病房準備...... 吓！？ 真係諗都冇諗過手術都可以提早嘅！
第二個係主診同我講解多次手術詳情『......，失敗率係三萬分之一，如失敗會即時修補，呢次手術係要開五個窿......』吓？唔係四個窿咩？← 我個心係咁諗，但係到呢個地步4個5個都要做啦，係有少少驚喜姐...

接近兩點左右推入手術室，麻醉師先喺我左手吉一吉，跟住同我講『唔好意思，呢邊搵唔到，要喺右手試過！』，好彩右手成功，當麻醉師注射咗麻醉液再比個氧氣罩我吸唔夠十秒後，我已經冇晒知覺，醒返已經做完，出返病床大概五點幾，主診話手術好成功，大約做咗3小時。

因為我做食道手術關係，由17號開始就要食流質食物，19號早上9點後更加連水都不能飲，做完手術返嚟，成身好痛好痛，落完麻醉又不能飲水，冇咩好做，唯有瞓覺，但咁鬼痛，點瞓呢？好彩主診叫姑娘幫我打枝止痛針，不過都痛咗我成粒鐘先瞓到。

手術當晚瞓醒第一件事睇下身上多咗啲咩：
1. 右邊鼻孔有條喉一直插到入胃，不斷抽緊藍色液體(藥水)出嚟；
2. 左腰有個球狀物體經一條喉駁入傷口入面抽瘀血；
3. 右手臂有個落藥口，加一條喉用嚟吊鹽水嘅。

7月19日晚，全晚都痛，瞓得都好差，落唔到床，小便都係用尿壺攪掂咋，慘！

7月20日早上，主診再嚟，比咗淡清水我試，問咗啲問題，先拆條鼻喉，舒服晒 ~ 再同我講可以試下食白粥水，結果午餐同晚餐都係食粥水，又少又稀，不過好過冇啦！下晝我試過落地行下，終於自己行到，雖然仲痛緊，但起碼去到廁所吖。

7月21日因上午要照 X 光，所以前一晚12點又要禁食禁飲水，早餐連粥水都冇得食，呢次 X 光目的係要知道手術是否真的成功，但係吊住鹽水、腰間有個瘀血波，照嘢真係唔方便！約11點幾完成返病床，立即通知姑娘照完喇，晏晝記住預我，嘩！正呀，雖然今次呢個午餐都係粥水，但係係有味嘅粥水呀(用肉煲然後只要粥水)！好味道呀！食完個午餐冇問題後，姑娘幫我拆埋條鹽水喉，即刻行動方便晒，到晚餐，仲正，啲粥係有米有肉碎嘅，好好好正呀！
晚餐前，姑娘連個瘀血波波都幫我收埋，全身剩底嘅一個打針口就喺當晚凌晨點幾拆埋，應該係因為主診晚上約11點嚟睇過我仲同我講：聽朝我嚟多次，冇特別就出得院喇。

7月22日經主診睇過後，確定我可出院回家喇，知道可以返屋企，原來心情會好開心嫁！

現在傷口仲有少少痛，未出得街住，另外兩星期內除要戒口外，亦唔可以食太硬嘅食物，要較軟身或近乎流質，因為喉嚨傷口個膜好薄，太硬驚會整穿，個薄膜完全生埋約需6星期，但頭兩個禮拜要特別小心。

最後多謝各位梁太之友對本人之關心，多謝各位，好快會返嚟見你哋，好掛住你哋呀！

再一次借此篇文章多謝嘉諾撒醫院仝人、特別係照顧過我嘅醫護人員、主診劉雄外科醫生、麻醉師、替我做動力測試嘅梁醫生、宏康醫學診斷中心仝人(中環化驗所)、中環太子大廈卓健醫療中心仝人，多謝你哋對我嘅照顧，多謝！

水與魚兒的對話

今日睇了一些汶川大地震的照片，其中一幅並非真實照片，而是一幅手繪畫。

畫中畫了一個小女孩，手持一枝亮起的蠟燭，緊閉雙眼，淚在淌，腮子更是佈滿紅筋 ...

此畫主題：『我們在一起』

主題上寫有一個故事，故事是這樣的：

魚兒對水說：『你看不見我眼中的淚，因為我在水中。』
水對魚兒說：『我能感覺到你的淚，因為你在我心中。』

睇完覺得好感動，所以希望跟大家分享分享。

物價

今日去檀島食個晏晝，坐隔離有一大班人正在午餐，八八卦卦聽下佢哋講咩，見有一位剛剛到步嘅女仕問一位已攞餐嘅男仕：

女： 咦！？做咩食五香肉丁麵呀？唔食餐肉？你唔係鍾意食餐肉嘅咩？
男： 抵啲吖嘛！而家五香肉丁成十幾蚊罐呀！

係喎！呢件事令我諗起，早幾日喺超市見到而家五香肉丁買成$16蚊罐呀！有冇攪錯呀？以前平民價$10蚊有兩罐，而家咩世界...究竟係成本貴咗？定係商家牟利重咗呢？人工又唔見加得多，唔通營商真係咁艱難？

講開檀島，順便發下嘮騷先，記得此店於機場開幕早期，合桃蛋糕同藍莓芝士包好食到不得了，不知何時開始，藍莓芝士包得番極少芝士，而合桃蛋糕比我嘅感覺係偷工減料咗，冇晒嗰隻正正蛋糕味，合桃直頭係轉咗供應商咁，整個蛋糕完全唔掂，我最初以為一時失手，之後我比咗三次機會佢，結果完全一樣，唔通又係百物騰貴嘅關係？

** 註：以上純屬個人意見，如你是檀島Fans，請多多見諒。**

黃飛鴻

根據歷史考據，黃飛鴻原名黃錫祥，生於一八四七年七月九日，中國廣東佛山人，從小家境清寒，跟著他的父親黃麒英一起練武，四處賣藥。根據香港武師／導演劉家良的描述，黃飛鴻的武術師承自陸阿采，陸阿采則是師承三德和尚，劉家良的父親劉湛當年是向林世榮學拳，而林世榮（電影中的「豬肉榮」）則是師承黃飛鴻。

點解會提黃師傅呢？提起黃飛鴻，相信大家都會記起關德興師父，他們彼此好像是掛勾的，今日小弟有緣在深宵電視的粵語殘片中看見關師父的演出，難得關師父在片中(粵語殘片)並非飾演黃飛鴻，大家估下佢演什麼角色吖？

提示：片名叫『哪吒大戰海龍王』

答案：請登入意見欄睇睇

閉路電視

上圖是一星期前在港鐡港島線某列車某車廂中影的，圓型物體下的字體是『車廂閉路電視測試中』，究竟此閉路電視有咩作用呢？防止罪案？阻客作用？阻嚇作用？紀錄？提升服務？幫助有需要嘅人？

雖然我冇答案，但相信離無人駕駛之期不遠了...

要做手術嘞

同大家匯報下病情進展先，初步已經預定在7月19日入院進行手術，點解話係"初步"呢，因為主診要我清晒所有幽門螺旋菌先可進行該手術，而我今日已進行了吹氣測試，下個星期一就知係咪鐡定7月19日做手術嘞。
而該手術會進行兩小時，用微創開四個窿，將因抽筋而收縮的食道部分之上及下各界開約2cm (更正：原來係上面界4至5cm，下面界2cm)，令該食道得以放鬆，手術完畢後需住院三日，之後"最少"要在家休息兩星期。
據主診講，手術後，五年內有10%機會會翻發 (因界開部分埋口而翻發，如翻發則需再做同樣手術或撐波仔)；5%機會會有胃酸倒流。
另外，今次我將入住山頂嘉諾撒，地點較為偏遠，各位唔駛嚟探我喇，我知大家有心就得嘞，手術必定會順順利利，我亦會好快健健康康咁同大家繼續遊山玩水的，請放心。

動力測試

做完動力測試 (食道) 嘞，之前上網查過動力測試 (尿道)，話係插入你個出口，跟住要你出力放出嚟，測試呢方面嘅"動力"；但關於食道嘅就搜尋唔到，更有人口述話可能要放個波入食道，然後抽出嚟......今日做完，終於知嘞：
首先會喺鼻孔噴啲麻醉藥要你索入去，跟住用條膠喉，搽啲KY，一直由鼻孔插入食道，我就最長被插入70cm嘞，插入之後，逐cm逐cm咁抽返出嚟，每cm都停低做電腦分析，主要係以計算壓力嘅方式嚟搵出係咪有一段、多段或全段的食道出現問題，當搵到目標後會停留耐啲，做多幾次分析，包括要吞啖水做測試，我就喺45-50cm嘅時候做咗十次吞水做分析嘞，整個測試做咗30分鐘，唔係十分辛苦，係條喉喺較上位置時頂住頂住咁，好唔舒服。
問過測試醫生，測試證實咗我個病係 Achalasia ，最好都係做手術，下一步就係要等6月18日去主診醫生度覆診，聽下佢嘅意見嘞。
報告完畢，各位真係唔駛擔心喎。

不幸中之大幸

今日去覆診，聽完5月28號啲測試報告嘞，主診醫生講咗一大堆我聽唔明嘅嘢，不過冇所謂啦，最緊要唔係癌症，所以呢個標題叫『不幸中之大幸』，以下等我講返啲我明嘅比大家知。

個病嘅名稱叫： Achalasia of esophagus (食道失弛緩症)，主要係話胃部幽門收窄，影響進食，之前醫生比咗隻藥我，係用嚟將幽門擴大的，但只可暫時有效，因為佢話食得冇幾耐呢隻藥就發揮唔到作用，治標唔治本，要切底治療，只有用微創手術，將窄咗嘅地方界開便可。但手術後，有5%機會會有胃酸倒流。

因為要進一步確定我係呢個病，嚟緊嘅13號，已經安排要到養和醫院進行一個『動力測試』，如果証實後就會安排做微創手術嘞，而家最慘嘅係，為咗此測試之準確性，要即時停止服用之前用嚟擴大幽門嗰隻藥，即係話，又要打回原形，而家食嘢唯有慢啲啦。

到咗6月18日再覆診後，就知道是否要做上述嘅微創手術嘞，如果只係胃抽筋嘅話又係第二種醫法。至於幽門螺旋桿菌，醫生就話係小問題。

報告完畢，再次多謝各位關心！多謝！

多謝大家關心

相信大家都知我今日射咗波，冇上堂，收到不少好友都聲SMS問候，多謝各位關心，但喺電話又不能詳細解釋我咩事，所以借梁太話比大家知：

其實在這半年內，發覺食嘢時不甚暢順，有時更有些哽塞，尤其是食一啲較難消化嘅嘢，而近呢兩個月更有愈來愈嚴重的感覺，所以趁自己放三日假期就走去睇醫生check清楚。

26-05-08 先睇普通科醫生，經轉介28-05-08到中環睇外科；
27-05-08 同黑鬼葉上鳳凰山山頂，正！
28-05-08 十一點去中環睇外科，足足做咗五個測試：

• 1. 麻醉照內窺鏡；
• 2. X光照肺；
• 3. 電腦掃瞄；
• 4. 灌槳X光照食道及胃；
• 5. 灌槳X光照腸。

分兩間診所做，做完晒所有測試都已經下晝五點，最慘係做測試前已經成十幾個鐘頭冇食嘢，計埋做完測試成20個鐘冇嘢落過肚，於是走去食碗雲吞面，唔知係咪落過麻醉藥，完全食唔落，一直到夜晚10點都食唔到嘢，個身又攰，冇辦法，唯有今日射波(醫生一早已吩咐及寫咗要休息)，好彩有射，因朝早仲未完全食到嘢，直到夜晚嗰餐先正常返。

暫時只知道有幽門螺旋菌，其他報告要等下星期二覆診先知結果嘞，冇事嘅，各位請放心。

鳳凰之顛 - 黑葉伴遊篇

鳳凰山：
山有兩峰，主峰(鳳)高934米，副峰(凰)高900米，是香港第二高山。其形如鳳凰展翅。遠望山頭崩爛，又稱爛頭山，英文名稱 Lantau Peak 由此而來，另因似雛鴉待哺，故又名鴉雀口山。

今日雖然無落雨，但密雲，一早起床，思前想後，終於等到11點半都忍不住要致電黑鬼葉，到鳳凰山一遊！全程共用了3小時，而行程如下：

伯公坳 → 牛塘坳 → 南天門 → 鳳凰山頂 → 天梯 → 心經簡林 → 昂平

此路段乃鳳凰徑第三段，全長4.5公里，由東涌坐車到達伯公坳入口，對對手錶 - 13：50，出發！最初一段，有點似曾相識，與往大東山路段頗相似，一路往上...一路往上，好快就到了紀念牌匾，心裡想，都不太難行，但一路行，上斜、落斜、再上斜，發覺要上山頂，真真唔係一件易事......當到達牛塘坳的涼亭休息時，翻開地圖睇睇，正！最辛苦嗰段已過！當然又估錯啦，難度只有增而無減，繼續要上石級、碎石路、石級、碎石路，好不容易才到達南天門，不知是否之前已經消耗不少體力，我覺得由南天門上山頂是全程最辛苦的，15：45 我倆終於到達山頂，即大約用了兩小時，沿途風景十分美......如果我哋睇得到的話......點解咁講？因為今日密雲，整段旅程都被濃霧包圍，能見度最差時，連前路10米內都不能看見，上面貼的照片都係咁啱喺濃霧中看見遠景時火速拍低的，講返到達鳳凰山之顛，心情真的莫名興奮，好開心好開心，終於征服咗鳳凰山，終於都到達山頂喇！正！感覺非常正！

鳳凰山頂，比我想像細得多，有一個避風亭，我入過，其實都好大風.......我們逗留了約15分鐘，落山往昂平，從山頂起點觀看此路段，好恐怖，感覺好危險，因濃霧關係，石級頗濕滑，和黑鬼葉商量後，決定不走回頭路，繼續由此路往昂平去也，此路名為天梯，翻查紀錄原來共有約1200級，石級頗為大級(如要由下而上，有些石級大概要提腿至心口位置)，沿途有些路段設有欄杆，有些郤沒有，此段比我感覺頗為危險，行了大約50多分鐘便到達了心經簡林，但落大石級、濕滑、因危險而步步為營、落山令雙腿尤其是令膝頭承受不少壓力、再加上肚仔開始餓，呢50幾分鐘，足足好似行咗個半鐘一樣！

到達昂平即往茶園醫肚，點知已收檔！唔係掛，5點幾就收檔？好彩在天梯途中有停低，每人食咗兩片排包，諗返呢兩片排包真係好好味道，可能我哋真係好肚餓......到達昂平巴士站，我哋都八八卦卦抬頭望望天壇大佛......都係睇唔到，只見梯級，梯級頂只係白朦朦一片，你話有幾大霧呢？

觀看 小馮 照片連結 請按此
觀看 鳳凰山 星華篇 請按此

總結：雖然濃霧，美景欠奉，但能登頂仍是十分興奮的，此路段比大東山及釣魚翁辛苦，但相對於大東往南山一段，又比較安全，所以我覺得如果要睇日出，由伯公坳上大東山較為合適，睇完日出後再由原路回伯公坳坐車返東涌較為安全。

另外要多謝黑鬼葉肯陪我呢個癲佬上鳳凰山，多謝你！

撒謊的女孩

【 蘋 果 訊 】 在 被 救 出 瓦 礫 的 倖 存 者 當 中 ， 13 歲 女 孩 米 雪 ， 在 絕 境 下 被 發 現 ， 因 為 怕 救 援 人 員 不 肯 救 她 而 說 謊 。 話 說 米 雪 地 震 當 日 在 都 江 堰 市 向 峨 小 學 上 課 一 刻 ， 二 樓 的 天 花 板 突 然 塌 下 ， 65 名 同 學 霎 時 全 被 埋 ， 之 後 的 10 個 多 小 時 內 ， 米 雪 處 身 在 伸 手 不 見 五 指 的 環 境 ， 身 邊 全 是 同 學 ， 但 她 們 竟 全 不 說 話 ， 因 為 都 變 成 屍 體 了 。 米 雪 想 過 會 這 樣 死 去 ， 但 她 求 生 意 志 堅 強 ， 不 斷 扯 破 喉 嚨 呼 救 ， 最 終 聽 到 外 間 傳 來 回 聲 。


訛 稱 同 學 昏 迷 了
「 外 邊 的 人 問 我 ， 壓 的 有 多 少 人 呀 ？ 我 說 有 七 、 八 個 ， 他 們 又 叫 其 他 人 說 話 ， 我 說 她 們 昏 迷 了 ， 說 不 出 話 。 」 米 雪 事 後 在 醫 院 的 病 床 上 講 述 當 時 情 況 。 她 最 終 被 救 出 來 ， 但 救 援 人 員 發 現 其 他 64 人 已 死 掉 ， 米 雪 道 出 一 番 道 理 ： 「 我 怕 你 們 見 被 困 的 人 太 少 不 肯 救 我 ， 於 是 說 謊 。 」 米 雪 雖 然 調 皮 的 說 ， 但 她 也 知 道 自 己 的 右 腿 可 能 因 為 肌 肉 壞 死 ， 最 終 需 要 切 除 。

↑以上是我今天在報紙上看到一則關於四川大地震的報導，有些事情真的難分對錯，在此登出只是想跟大家分享分享

四川7.8級地震

『5月12日四川7.8級大地震後，震央汶川多個城鎮被夷為平地，道路及通訊中斷，當局派出直升機及傘兵空降救援，總理溫家寶 也乘直升機到汶川視察。』

在這幾日，各大報章、電視台、電台都環繞此大災難......

截至剛才電視新聞報導：官方死亡人數已增至14866人，數以萬計的人仍被困在瓦礫之中......

每次聽到有關此災難的新聞，心裡都十分難過......

梁太同大家作出呼籲，如果可以的話，請大家都伸出援手吖，以下係一啲捐款戶口嘅資料：

宣明會

匯豐銀行：018-554444-001

恆生銀行：286-364385-003

中國銀行：012-883-0-002666-2

救世軍 (捐款熱線：27832333)

匯豐銀行：580-149649-001

中國銀行：012-878-1-061887-6

東亞銀行：015-515-10-50541-3

紅十字會

匯豐銀行：567-650155-016

恆生銀行：267-175123-001

中國銀行：806-0-000161-7

東亞銀行：514-40-39966-3

樂施會

匯豐銀行：001-537000-012

中國銀行：012-874-0010515-7

聯合國兒童基金會 (捐款熱線：28336139)

匯豐銀行：507-354014-005

中國銀行：012-875-1-081085-5

永隆銀行：020-601-003-7635-2

** 以上捐款資料由都市日報轉載 ***

426 歡送宴

426 歡送宴已於昨晚假坐荔枝角富臨酒家順利舉行，此次主角分別是咪咪、茄墳、邦邦、星星及癲豆 (排名不分先後) ，今次除開開心心一起共進了一席豐富晚餐外，席中人位位真情流露，更有人感觸流淚，大家始終長達十年感情...... 酒席過後再到旺角把酒談天作樂，雖然本人未能出席，但相信氣氛定必十分感人，如可以的話，請出席者在意見板上留下當晚情況與閣下感受吖。在此我再恭祝五位主角一路順風，心想事成，一帆風順。

美 美 照片連結 請按此

星 星 照片連結 請按此

爸 乸 照片連結 請按此

大東山

大東山，高869米，為香港境內第三高峰，尋日早上觀察過天色，持續放晴，放工後決定相約星星仔一同往大東進發去也，今次行程：

伯公坳 → 大東山 → 繞二東山及雙東坳 → 南山郊野公園 → 嶼南道

2點33分到達伯公坳，開始旅程，而今次正正是鳳凰徑第二段，全長約6.5公里，一開始全程向山上，斜度一般，一直向上爬確需要一定體力，但每高一點，視野愈是遼闊，對望鳳凰山、遠眺分流、籮箕灣、索罟群島全景、石鼓洲、南丫島、長洲、喜靈洲、周公島、坪洲、交椅洲、香港島南面，通通盡收眼底，可惜昨日始終能見度偏低，如能見度高的話，相信就連遠至蒲苔島都可以見到。上到接近山頂，地勢開始偏於平坦，而風勢亦比較大，十分清涼，向前行了不久，望向遠方見十多間石屋，原來已經到達大東著名景點『爛頭營』，石屋群比我嘅感覺好似去咗荷蘭、丹麥咁，好有特色，但我們參觀了兩三間石屋後，天氣開始轉變，先是一片大霧由北面湧至，好壯觀，五分鐘內，180度由天晴轉為微雨，於是我們二人便決定要用較快速度下山去，沿途快快參觀石屋，影相也是急急的，過了爛頭營，進入二東山段，雨勢愈來愈大，我們連相機都要收起，連忙趕路，上山辛苦、而落山就危險，因為有些路段頗險峻，石面有青苔、地衣等，加上雨水後令石頭變得十分濕滑，沿路更滿佈碎石，真是稍有差池，後果不堪設想，當時又要擔心太慢落山，又會天黑，我同星星仔終於領會到，什麼叫做『千祈唔好急，但係要快』嘅道理............ ，6點13分，我們到達南山郊野公園嶼南道出口，完成今次旅程，全程共用上3小時40分，心情好興奮，唯落山一段全程皆被雨水、霧水籠罩，未能為大家拍下照片，實是可惜，但今次體驗對於我們兩人確是難得且難忘的。

而旅程當中有一些小插曲：

1. 明明知道前面有一隻『大鳥』，因逃避我倆而走入樹叢，又明知佢會無啦啦飛出嚟，但係當佢真係飛出嚟嘅時候，我哋都仍然『嘩』咗出嚟，嚇一嚇。
2. 路上遇上一條蜈蚣，雖然唔大條，但係佢紅色嘅部分係鮮紅色嘅，一般我見過嘅只係暗紅色的，呢條蜈蚣比我感覺佢好毒..............
3. 在南山的某段路上，當時星星正用行山竹篤吓篤吓之際，我見到有一條類似青竹蛇喺星星仔後面橫過，我當然大嗌話佢知叫佢急急繼續前行，我就等條蛇大哥完全離開，先夠胆行過，驚驚！

縱觀今次旅程，雖然辛苦，但好興奮、有體驗、有得着，多謝星星仔！

觀看 小馮 照片請按 此連結

觀看 星星 照片請按 此連結

** 資料補充：網上查過，原來爛頭營的由來有另一個說法，可到 此連結 睇睇，至於邊個係真，我就唔清楚嘞。至於當中18號石屋裡面的相片，則可往 此連結 **

紫羅蘭山徑之旅

4月16日，早上天氣報告報導颱風浣熊即將接近本港，立即探探天色，幸好仍然天朗氣清，我們一行九人按照原訂計劃，繼續紫羅蘭山徑之旅：
黃泥涌水塘公園 → 引水道 → 淺水灣坳 → 大潭中水塘 → 大潭篤水塘 → 大潭道
紫羅蘭山徑，走畢全程，共用了4小時，坡幅落差不大，全程輕鬆易走，初段風景一般，但到了淺水灣坳景觀開始遼闊，中尾段到大潭水塘，景色更是怡人，確是不枉此行，值得一遊。
完成山徑旅程後，咱們於大潭道坐車往赤柱食晏，然後四處逛逛，最後品嚐西式甜品才解散，好飽...好滿足！

*** 在此特別鳴謝今次領隊士爸乸策劃及士爸公協辦此次旅程，多謝！***


觀看 士爸乸 照片請按 此連結
觀看 美 美 照片請按 此連結
觀看 小 馮 照片請按 此連結

上環

放假去咗上環，影下相、食下嘢，而家先發覺原來上環幾特別，新舊建築並存、華洋交雜、遊客眾多、有好長嘅樓梯、有好多嘅廟宇........ 呢次影得好少相，因為影影下開始落雨，相片已經放咗落相簿同大家分享下，如要睇睇，請按 此連結 吖。

助語詞之運用

尋日，在巴士站排隊上車的時候，在隊中見A女士巧遇B女士及其兩女兒，A女士一見B女士隨即大叫的說：『喂！妳個女咁大個嘅？』，全巴士站的人們都將注意力放在B女士及其大女兒身上，見佢真真尷尬非常.....好慘........

於是我在想，如果當時A女士咁表達會唔會好啲呢？
『喂！妳個女咁大個嗱？』

唔知各位點睇呢？