08年度足球隊隊名公投

各位，一年一度公司足球比賽又就到嘞，今年搵咗七個選擇比大家，現已將投票箱放置於網頁之右上角，每人限投一票，並於6月15日截止投票，只要你係梁太之友就有權投票，齊齊幫我哋球隊投返個好名吖。



註：選擇球隊後請按 "Add my Vote!" 確認選擇。

UwillPay Vs Turbo

賽前熱身(一)


賽前熱身(二)

由於今日都拍下頗多影片，所以只貼兩條熱身片段喺度，另已從賽事中挑選了13條短片出來，各位可雙擊下圖，登入eSnips慢慢欣賞，順次序睇就可以：

UwillPay 8月30日比賽實況

今晚我隊各球員狀態都幾好，全場大部份攻勢由我方發動，而今日值得一讚係我方龍門表現神勇，可惜上半場早段已比對方射入罰球，事緣華仔因救球心切，膊頭撞到對方勁射嘅皮球，皮球繼而應聲入網，華仔！我哋係唔會怪你，不用自責，比賽梗有輸贏，再講，唔係你前幾場嘅入球，我哋又何來今日嘅成績呢？況且你只係想救波，千祈咪放喺心呀，我哋球隊永遠團結！

其實上下半場我哋都有不少機會，可惜都未能把握，結果輸比Turbo 0：1，食海鮮時再得知 Ghost 勝 APM 5：0，我哋因得失球差，與今屇八強無緣嘞。

各隊友，今年輸咗唔緊要，都踢得好好吖，下年再接再厲，爭取佳績！

總結今年賽事：
我哋嘅神射手係：華仔。
而癲豆亦喺比賽當中入到佢嘅第一球。

另如各位如有興趣可改定下年足球隊隊名，隨時比我，到時間合適再擺上嚟梁太比大家公投啦。

食棧海鮮宴

雖然球隊今日輸零比一，計得失球後，UwillPay 被踢出局，下年再接再厲，因為輸贏唔重要，只要我哋一班人開開心心踢我哋嘅開心足球就足夠嘞！

踢完比賽，我哋一行十七人浩浩蕩蕩，到了樂富食棧海鮮酒家，十七人坐埋一張枱，正！

以下係今餐嘅菜單：

大花龍蝦伊麵
大石倉兩食(炒球及魚粥)
豉椒炒大竹聖
果皮蒸大鮑魚
椒鹽賴尿蝦
薑蔥焗羔蟹
惹味魚湯(美國蠔+象拔蚌)
至尊燒鵝
海皇焗飯(大家都飽嘞，所以冇上呢樣)
楊枝甘露
芒果/榴槤班戟(呢樣送嘅)
汽水/啤酒任飲

可能因為一班人食嘅關係，今日覺得樣樣都OK喎，而我就較喜歡個魚粥、燒鵝汁同賴尿蝦，要彈就彈啲蝦細隻啲唧，仲有，比較特別嘅係楊枝甘露放咗冰，食落凍凍哋都幾過癮，正！

另外在此要特別鳴謝 經理占 統籌，領隊豪 協辦，攪咗呢餐又豐富、又好味、又滿足嘅海鮮宴比我哋呢十五兜友仔食，多謝你哋呀！

報仇雪恨

C組經過尋晚賽事後，洪都以首名出線嘅機會較大，次名則是跳跳虎及黑山之爭，而呢場爭出線之戰，亦被安排為C組尾輪尾場進行，但仍以黑山機會較大。

唔知大家仲記唔記得，喺某年前，我隊被黑山做場和波，而趕咗我隊出局，我想報仇好耐，今年機會嚟嘞，如果我哋以首名出線，對黑山嘅機會就十分、十分大嘞！

UwillPay 努力呀！30號對 Tubro 唔止要和波咁簡單，要砌低埋佢攞首名出線去報仇呀！

UwillPay 海鮮餐

下星期四，8月30日，下午6點至7點，我哋足隊 UwillPay 將在摩士3號球場進行單循環嘅尾場賽事，雖然未肯定我隊能否順利進入八強，但呼聲頗高，因為只要和波，我哋便能成功入圍。

為慶祝今年球隊取得佳積，領隊豪及久未出席足球活動嘅球隊經理人....占叔，當天亦會到場打氣！

難得咁人齊，經理占決定攪攪佢，於當晚賽事完畢，約八點左右假座：

九龍城聯合道(近東頭村道)食棧海鮮酒家

一齊食返餐海鮮，由於雖要訂枱及通知酒家買料關係，所以必須要核實出席人數，初步預算每位 HK$250至HK$300。

有意者請於8月26日前先交HK$250給占叔、阿豪或小馮，收錢為作實參加該海鮮團，呢次唔止 UwillPay 而係 U must Pay。

已報名之人仕包括：

1. 占叔
2. 粉葛
3. 阿立
4. 星星
5. 臭之媽
6. 阿雯
7. 領隊豪.......................紫色，占或豪已收錢
8. 小馮
9. 雷健
10. 拍七
11. 豆豆
12. 華仔 .........................紅色，小馮已收錢
13. 隊長
14. 賓仔
15. Wing
16. 大蝦
17. 阿弟 .........................綠色，口頭應承但未收錢
18. 黑鬼葉
19. 租樓
20. 星星女
21. 大力 .........................黑色，九成不能參與。

多謝各位參與，現肯定到的有17人，會訂兩枱，初步餐單為：燒鵝、深海泥鯭炒球、乾煎大蝦碌、椒鹽賴尿蝦、蒸鮑魚仔、龍蝦伊麵、椒鹽鮮魷等。

雖然已經截止報名，但每枱仍有位剩，仍然歡迎閣下參加，但請於8月29日晚上6點前致電領隊豪或經理占預約，以免出現嚟到冇得吃嘅場面。

註：請注意，因為深海泥鯭、大蝦碌、大賴尿蝦係需要預早幾日訂的〈計人頭〉，所以於8月26日後才報名的人仕，好有可能係冇呢三様海鮮食嘞。

足球個人技術

特別送比 UWillPay 全隊球員嘅，希望我哋都可以從中學到一招半式就好嘞。

UwillPay (八一七) 比賽報導

上圖藍衫係我隊，而黑衫就係我哋昨晚嘅對手Ghost嘞，總結呢隊球隊踼法都幾粗野，頭頂腳踢，野野硬朗。
其實合計全場，我哋稍稍好過佢哋，但亦是我隊首先失守，上半場，對方前鋒吼準我方龍門一次出迎，撥入我方大門，結果上半場Ghost領先 0：1。
下半場，我隊別無選擇要強攻對手來收復失地，幸運的，憑藉華仔與阿弟一次組織攻勢當中，殺入對方心臟地帶，迫使對方後衛要用技術犯規，於禁區鏟低阿弟，搏得一9碼球，由華仔操刀，追成 1：1 ，而最終亦以呢個比數完場。

下場比賽將於 8月30日 晚 18:00 於摩士 3 號場舉行，對手係Turbo，我方只要和波就可出線入八強，但如果唔好彩輸的話，就要跟Ghost計得失球。以下為我計算的得失球差，以供各隊友參考：

UwillPay ..... 現時打三場得 10 失 2 = +8球
Ghost .......... 現時打三場得 6 失 3 = +3球


以下係假設我隊下場輸比Turbo，Ghost 要轟入 APM 幾粒才對我方構成威脅：

我隊如輸 ：

• 0：1 (+7)，Ghost 要入 4：0 (+7...要抽籤決定那隊出線)
• 0：2 (+6)，Ghost 耍入 4：0 (+7...A組次名出線)
• 1：2 (+7)，Ghost 要入 5：0 (+8...次名出線)
• 0：3 (+5)，Ghost 要入 3：0 (+6...次名出線)
• 1：3 (+6)，Ghost 要入 4：0 (+7...次名出線)
• 2：3 (+7)，Ghost 要入 5：0 (+8...次名出線)

以上只係計定數，8月30日的比賽，大家請繼續努力，爭取勝利，殺入八強！

817足球戰術

今晚比賽對手Ghost上星期大炒PMD......5：1

今日八過，原來Ghost打法主要集中高空攻勢，而比賽當日下雨，球場亦較細，球員又偏年輕，有體力，加上PMD之前已輸掉兩場，再無出線機會下被Ghost於下半場由 2：1 改寫為 5：1。

經與隊長商討後，因為如我們和波的話，出線機會仍較大，所以今晚希望採取穩守突擊戰術，前鋒無須於前場標波，集中在中後場作迫搶、攔截，不佈越位陷阱，務求引對手攻，再作反擊。先求和，再求勝！

大家今晚努力呀！ UwillPay 必勝！

UwillPay 下場比賽日期

致各隊友，A組比賽時間表已經全部出齊，而我哋下場比賽會喺八月十七日晚，6點至7點於摩士公園3號場舉行，對手係 Ghost ，各位請繼續努力！爭取首名出線！UwillPay 必勝！


註：因本人當晚要去九龍灣睇張敬軒演唱會，所以最多只可參與半場，請各位見諒。

UwillPay 射手榜

• 華仔..........5球
• 阿弟..........2球
• 隊長..........1球
• 癲豆..........1球
• 雷健..........0球
• 小馮..........0球
• 立仔..........0球
• 拍七..........0球
• 仲嚟..........0球
• 租樓..........0球
• 黑葉..........0球
• 大蝦..........0球
• 大力..........0球
• 領隊豪.......0球
• 史提夫.......0球

* 資料更新於8月30日。

空中控球及轉身竅門

↑控球，係踢足球嘅基本技術，除了用手外，身體每處都可控球，秘訣係控球時要懂得卸力，上圖呢位示範員久經訓練，身體各部份控球停球都絕無難度，對於熟練嘅球員，要研究嘅反而係用邊部份控停才最具優勢，睇下示範員，佢用呢度控嘅好處多的是：肌肉柔軟，卸力速度快、保護面積大，整個屁股一直護住個波、而最大嘅好處係，遇上好似上圖呢種讀過吓書嘅後衛，會擰歪面，非禮勿視嘛，咁就有大把時間比你控低個波啦。

大家還需留意示範員個口係緊緊合埋，如用呢個部位接球的話，千祈咪張開口抖氣，如一洩氣，後果自負......

註：示範員係接受過專人訓練，小朋友切勿模仿。

↑控定咗，要開始轉身嘞，主要都係要攞身位先，護住個波，轉身！大家睇下上圖個七嘅仔，佢流露出驚嘆嘅表情，一方面佢知道隊友要使出轉身絕技，一方面佢對對方球員已產生憐憫之心，點解？請睇埋落去.....

↑馬步要穩，非控球腳做重心，雙手仿似操兵咁作平衡，擺動蛇腰，但仍要保持心情平和，呢個示範員同之前教斬波嗰個一樣，望住個波嗰時都係面帶笑容嘅。

↑承上圖做出隨擺動作，上身(雙手)盡量伸展，留意示範員右手拳頭，冇錯，食指突咗出嚟，有習武或者有睇開暴力漫畫嘅都知道...係鳳眼拳！而下身亦發力作勢朝皮球方向踢出。

↑唔駛踢到個波嘅，睇睇示範員，對方一心以為示範員轉身係為咗踢波，但萬料不到，原來佢發盡全力轉身，唔係踢個波，而係一個鳳眼拳打對手一嘢，再連消帶打，一踭打落對方肚皮，嗱！咁咪可以成功輕輕鬆鬆轉身再帶波向前囉。

學到未？未？比心機啦！

UwillPay七一六比賽外傳

見大家反應咁好，比多兩段片你哋睇下：



↑呢段就係上半場第一球入球片段嘞，大家睇下呢班友仔，影唔到入球，竟然諗住搵人扮慶祝就算，哼~



↑呢段係上半場第五個入球，評論員試圖解釋Up Side，結果就係嗰個評論員喺度噏西噏西、噏東噏西，嗱！又影唔到嘞！

UwillPay第二場再勝利 (第三集)

下半場開始，我隊換出阿馮、華仔、雷健、仲嚟，而換入嘅有拍七、立仔、阿葉與及癲豆。
攻勢仍然是我方較旺盛，各球員嘅入波慾念似乎未止。


第三集：下半場精華片段

↑中場休息，領隊豪即場訪問。



↑下半場精華，同場加影『施丹轉身』，朋友，學嘢係時候嘞！


下半場我方攻勢未止，最後由豆豆將比數改寫為六比零完場，順帶一提，此入球過程係由我隊人稱『前鋒孖寶』創造而成，先由拍七左路交出，豆豆接應撞入，而呢球亦係豆豆自參加公司賽九年來嘅第一個入球，大家知佢有幾開心啦。

更多今晚相片 請按此連結

各位隊友，下場比賽會對 Ghost ，大家繼續努力，爭取首名出線呀！

返回第一集 請按此

UwillPay第二場再勝利 (第二集)

上半場終於開始，今次首先出場嘅有：

• 龍門..........史提夫
• 右後衛.......雷健
• 左後衛.......隊長
• 左中場.......仲嚟
• 右中場.......阿弟
• 影子前鋒....華仔
• 正前鋒.......阿馮
  

第二集：上半場精華片段

↑上半場一開波，我隊已經佔盡優勢，而入波只係時間嘅問題。

↑連入三球！可惜的是.......只影到第四個入球比大家睇。

承上，我方球隊於上半場佔盡九成以攻勢，而於完上半場時已經五比零，入球次序下列：

• 第一球→華仔
• 第二球→隊長
• 第三球→華仔
• 第四球→阿弟
• 第五球→阿弟

以下為隊長之精彩入球，完全反映出隊長嘅技術同胆色！

*睇完連環圖大家有冇發覺，本來36號條友仔係想喺遠柱接應隊長傳出，用頭搥頂入嘅，點知隊長已經自己射入，所以呢球真真正正名符其實係.........冇得頂呀！隊長！


繼續觀看第三集 請按此

UwillPay第二場再勝利 (第一集)

UwillPay 球隊今晚比賽再宣佈勝利，全取3分，而計得失球差，暫列A組榜首，實在可喜可賀！
今晚多得領隊豪，放棄落場，專注於拍攝影片下，我哋擁有大量短片，因篇幅有限，今次分為三集，為大家送上今晚精華！


第一集......賽前準備：

↑睇下我哋嘅球員係點熱身？個個輕輕鬆鬆，但有啲就似足一匹野馬！



↑領隊豪教你學踢波！



↑領隊豪一學完踢波，即時教各位踢波！



↑快將開波，介紹我哋今日對手，及本隊各猛將！

繼續觀看第二集 請按此

專家教你點斬波

1.望清楚想斬出嘅正確位置

2.休高條衭，睇下對腳係咪自己嘅先

3.望實個波，咪比個波走咗去

4.提起右腳時，必須提起左手

5.斬完記住即走，斬得差都唔駛比人鬧

點？學識未？大家唔好剩係學示範員嘅腳部動作，本課程其實係想大家學懂踢波應持什麼心態，各位請留意示範員嘅面部表情，由頭到尾都充滿笑容，你哋話就算佢斬得幾差都好，有邊個會忍心去鬧佢呢？知道未？

UwillPay 頭場勝利！

終於到咗比賽日，我哋跟對手PMD因被編為A組頭兩隊，所以今場係公司足球賽嘅頭場，18:00兩隊球員同攪手先嚟一個大合照，攪手主持開球儀式後，球賽正式開始！

團體照(拍七揸機立仔未到，冇入鏡)


我隊首先出場球員有：

• 史提夫(龍門)
• 大蝦 (後衛)
• 隊長(後衛)
• 華仔(右中場)
• 阿弟(中場中)
• 尊尼(左中場)
• 拍七(正前鋒)
  

開賽早段，雙方先摸索對手實力，形勢有點膠着，五分鐘後，形勢開始對我方有利，大部分攻勢都由我方發動的，時間上半場十三分鐘，拍七出場換入雷健作正前鋒，繼續加強攻勢，就在約十六分鐘左右，PMD一個反擊，突破越位，成單刀射穿我方龍門五指山，將比數改寫成 1 : 0 ，尤幸的是，我隊未比此入球打亂陣腳，到了上半場十九分鐘，我方在左路取得界外球，隊長使出手榴彈戰術，華仔成功接應在小禁區勁抽入網，將比數追平 1 : 1 ，上半場廿一分鐘，尊尼調出，換入小馮作正前鋒，將雷健放後一格，負責右中場位置，而華仔就轉往左路搵食，但比數再冇改變，上半場(25分鐘)一比一完場。

阿弟斬角球，華仔準備用掃把腳熨入一刻，大家留意對方8號由頭到尾完全冇任何動作.........

入波！一比一！

↑UwillPay 第一球入球連環圖

下半場甫一開始，雙方互有攻守，但攻勢仍是我方佔優，過了十分鐘左右，雷健被調出，換入立仔作正前鋒，小馮退後作右中場，我哋嘅努力終於喺下半場約十五分鐘得到回報，阿弟在中前場交出一直線球將對方後衛完全撕破，成功將皮球交到華仔腳下，而此時華仔加速突破，形勢頓成半單刀狀態，華仔亦不負眾望，將比數射成 1 : 2，此球之後，PMD加強攻勢反擊，到了約十九分鐘的時候，更有單刀機會射門，幸好史提夫身手了得，撲出將皮球緊緊的抱入懷中，力保不失！下半場廿一分鐘，調出阿弟，換入租樓此位攔截中場，務求專注防守，將比數維持，到下半場廿五分鐘，球場証鳴笛完場，UwillPay 終以 1 : 2 擊敗 PMD ，全取3分，我方全隊球員都開心躍起！勁！

華仔單刀，不負眾望，將皮球送入對方龍門！1 : 2 ~

↑UwillPay 第二球入球連環圖

在此多謝球隊各位成員全力以赴，取得今場勝仗！繼續努力呀！爭取A組首名出線！

提提各位：下場比賽，7月16日，7:00pm~8:00pm，對手 APM。

更正啟示：有關第一球入球，之前資料錯誤，正確應由隊長開出畀外球，而不是由阿弟開出角球，在此小弟向隊長致萬二分歉意！

UwillPay 必勝！

Get Your Card

特登造出嚟，為今年足球隊打氣嘅，努力呀！ UWillPay 必勝！！

UwillPay 比賽時間表

PMD	對	Uwillpay	九龍灣	│	Turbo	對	Ghost	九龍灣
09-JUL	1 : 2				09-JUL		1 : 0
PMD	對	Turbo	九龍灣	│	UwillPay	對	APM	九龍灣
16-JUL	0 : 1				16-JUL		7 : 0
PMD	對	Ghost	摩士3	│	Turbo	對	APM	摩士3
9-AUG	1：5				9-AUG		2：0
UwillPay	對	Ghost	摩士3	│	PMD	對	APM	摩士3
17-AUG	1：1				17-AUG		3：0
UwillPay	對	Turbo	摩士3	│	Ghost	對	APM	摩士3
30-AUG	0：1				30-AUG		5：0

2007足球隊抽籤結果

A 組：

• PMD
• UwillPay
• Turbo
• Ghost
• APM

B 組：

• 師兄隊
• 四合
• Orange
• 富城
• 保安之友

C 組：

• 洪都拉斯
• 新動力
• 藍戰士
• 黑山同盟
• 跳跳虎

D 組：

• 小濠灣火車頭聯隊
• 兄弟足球隊
• 藍魔鬼
• 突破
• 黃色潛艇

*** 各位隊友！今年加油，全力以赴，爭取好成績呀！！