健康金字塔

做完手術後，對飲食開始多點注意，送比大家一個可能遺忘已久嘅食物金字塔。

祝願各位 平平安安！ 健健康康！生活愉快每一天！

環保汽車

上圖呢架車大家見過未？無需入油、無需叉電，全人力推動！小弟有幸喺圓方某超市入面見到！小朋友坐得興奮又開心、大人買嘢安心又放心！值得推介！未見過嘅得閒經過去睇下吖 ~

手術成功

7月19日，上午11點，到達舊山頂道1號嘉諾撒醫院，因為是下午3點才安排做手術，所以兩點前預備妥當(消毒水沖涼及換上手術服)在病床等候就可以，一辦完入院手續，到床位放低物品後，即落樓四處行下，整間醫院較舊，房租包膳食，地下有兩間餐廳，好貴但有幾台電腦可供上網，有些房間更設有WiFi服務，我住嗰間就冇嘞，因為最平嘛，另外各房間都有電視睇，電動床，召喚鐘等等，姑娘幾好人兼盡責，喺度要多謝佢哋嘅照顧，呢次發覺原來照顧病人要有好大嘅忍耐力先得，醫護工作真係好辛苦！

今次有兩個驚喜，都係主診比我嘅：
第一個係12點幾當我在醫院週圍行緊嘅時候，收到姑娘電話，內容係手術時間改咗下午兩點做，要立即上病房準備...... 吓！？ 真係諗都冇諗過手術都可以提早嘅！
第二個係主診同我講解多次手術詳情『......，失敗率係三萬分之一，如失敗會即時修補，呢次手術係要開五個窿......』吓？唔係四個窿咩？← 我個心係咁諗，但係到呢個地步4個5個都要做啦，係有少少驚喜姐...

接近兩點左右推入手術室，麻醉師先喺我左手吉一吉，跟住同我講『唔好意思，呢邊搵唔到，要喺右手試過！』，好彩右手成功，當麻醉師注射咗麻醉液再比個氧氣罩我吸唔夠十秒後，我已經冇晒知覺，醒返已經做完，出返病床大概五點幾，主診話手術好成功，大約做咗3小時。

因為我做食道手術關係，由17號開始就要食流質食物，19號早上9點後更加連水都不能飲，做完手術返嚟，成身好痛好痛，落完麻醉又不能飲水，冇咩好做，唯有瞓覺，但咁鬼痛，點瞓呢？好彩主診叫姑娘幫我打枝止痛針，不過都痛咗我成粒鐘先瞓到。

手術當晚瞓醒第一件事睇下身上多咗啲咩：
1. 右邊鼻孔有條喉一直插到入胃，不斷抽緊藍色液體(藥水)出嚟；
2. 左腰有個球狀物體經一條喉駁入傷口入面抽瘀血；
3. 右手臂有個落藥口，加一條喉用嚟吊鹽水嘅。

7月19日晚，全晚都痛，瞓得都好差，落唔到床，小便都係用尿壺攪掂咋，慘！

7月20日早上，主診再嚟，比咗淡清水我試，問咗啲問題，先拆條鼻喉，舒服晒 ~ 再同我講可以試下食白粥水，結果午餐同晚餐都係食粥水，又少又稀，不過好過冇啦！下晝我試過落地行下，終於自己行到，雖然仲痛緊，但起碼去到廁所吖。

7月21日因上午要照 X 光，所以前一晚12點又要禁食禁飲水，早餐連粥水都冇得食，呢次 X 光目的係要知道手術是否真的成功，但係吊住鹽水、腰間有個瘀血波，照嘢真係唔方便！約11點幾完成返病床，立即通知姑娘照完喇，晏晝記住預我，嘩！正呀，雖然今次呢個午餐都係粥水，但係係有味嘅粥水呀(用肉煲然後只要粥水)！好味道呀！食完個午餐冇問題後，姑娘幫我拆埋條鹽水喉，即刻行動方便晒，到晚餐，仲正，啲粥係有米有肉碎嘅，好好好正呀！
晚餐前，姑娘連個瘀血波波都幫我收埋，全身剩底嘅一個打針口就喺當晚凌晨點幾拆埋，應該係因為主診晚上約11點嚟睇過我仲同我講：聽朝我嚟多次，冇特別就出得院喇。

7月22日經主診睇過後，確定我可出院回家喇，知道可以返屋企，原來心情會好開心嫁！

現在傷口仲有少少痛，未出得街住，另外兩星期內除要戒口外，亦唔可以食太硬嘅食物，要較軟身或近乎流質，因為喉嚨傷口個膜好薄，太硬驚會整穿，個薄膜完全生埋約需6星期，但頭兩個禮拜要特別小心。

最後多謝各位梁太之友對本人之關心，多謝各位，好快會返嚟見你哋，好掛住你哋呀！

再一次借此篇文章多謝嘉諾撒醫院仝人、特別係照顧過我嘅醫護人員、主診劉雄外科醫生、麻醉師、替我做動力測試嘅梁醫生、宏康醫學診斷中心仝人(中環化驗所)、中環太子大廈卓健醫療中心仝人，多謝你哋對我嘅照顧，多謝！

水與魚兒的對話

今日睇了一些汶川大地震的照片，其中一幅並非真實照片，而是一幅手繪畫。

畫中畫了一個小女孩，手持一枝亮起的蠟燭，緊閉雙眼，淚在淌，腮子更是佈滿紅筋 ...

此畫主題：『我們在一起』

主題上寫有一個故事，故事是這樣的：

魚兒對水說：『你看不見我眼中的淚，因為我在水中。』
水對魚兒說：『我能感覺到你的淚，因為你在我心中。』

睇完覺得好感動，所以希望跟大家分享分享。

閉路電視

上圖是一星期前在港鐡港島線某列車某車廂中影的，圓型物體下的字體是『車廂閉路電視測試中』，究竟此閉路電視有咩作用呢？防止罪案？阻客作用？阻嚇作用？紀錄？提升服務？幫助有需要嘅人？

雖然我冇答案，但相信離無人駕駛之期不遠了...

要做手術嘞

同大家匯報下病情進展先，初步已經預定在7月19日入院進行手術，點解話係"初步"呢，因為主診要我清晒所有幽門螺旋菌先可進行該手術，而我今日已進行了吹氣測試，下個星期一就知係咪鐡定7月19日做手術嘞。
而該手術會進行兩小時，用微創開四個窿，將因抽筋而收縮的食道部分之上及下各界開約2cm (更正：原來係上面界4至5cm，下面界2cm)，令該食道得以放鬆，手術完畢後需住院三日，之後"最少"要在家休息兩星期。
據主診講，手術後，五年內有10%機會會翻發 (因界開部分埋口而翻發，如翻發則需再做同樣手術或撐波仔)；5%機會會有胃酸倒流。
另外，今次我將入住山頂嘉諾撒，地點較為偏遠，各位唔駛嚟探我喇，我知大家有心就得嘞，手術必定會順順利利，我亦會好快健健康康咁同大家繼續遊山玩水的，請放心。

不幸中之大幸

今日去覆診，聽完5月28號啲測試報告嘞，主診醫生講咗一大堆我聽唔明嘅嘢，不過冇所謂啦，最緊要唔係癌症，所以呢個標題叫『不幸中之大幸』，以下等我講返啲我明嘅比大家知。

個病嘅名稱叫： Achalasia of esophagus (食道失弛緩症)，主要係話胃部幽門收窄，影響進食，之前醫生比咗隻藥我，係用嚟將幽門擴大的，但只可暫時有效，因為佢話食得冇幾耐呢隻藥就發揮唔到作用，治標唔治本，要切底治療，只有用微創手術，將窄咗嘅地方界開便可。但手術後，有5%機會會有胃酸倒流。

因為要進一步確定我係呢個病，嚟緊嘅13號，已經安排要到養和醫院進行一個『動力測試』，如果証實後就會安排做微創手術嘞，而家最慘嘅係，為咗此測試之準確性，要即時停止服用之前用嚟擴大幽門嗰隻藥，即係話，又要打回原形，而家食嘢唯有慢啲啦。

到咗6月18日再覆診後，就知道是否要做上述嘅微創手術嘞，如果只係胃抽筋嘅話又係第二種醫法。至於幽門螺旋桿菌，醫生就話係小問題。

報告完畢，再次多謝各位關心！多謝！

多謝大家關心

相信大家都知我今日射咗波，冇上堂，收到不少好友都聲SMS問候，多謝各位關心，但喺電話又不能詳細解釋我咩事，所以借梁太話比大家知：

其實在這半年內，發覺食嘢時不甚暢順，有時更有些哽塞，尤其是食一啲較難消化嘅嘢，而近呢兩個月更有愈來愈嚴重的感覺，所以趁自己放三日假期就走去睇醫生check清楚。

26-05-08 先睇普通科醫生，經轉介28-05-08到中環睇外科；
27-05-08 同黑鬼葉上鳳凰山山頂，正！
28-05-08 十一點去中環睇外科，足足做咗五個測試：

• 1. 麻醉照內窺鏡；
• 2. X光照肺；
• 3. 電腦掃瞄；
• 4. 灌槳X光照食道及胃；
• 5. 灌槳X光照腸。

分兩間診所做，做完晒所有測試都已經下晝五點，最慘係做測試前已經成十幾個鐘頭冇食嘢，計埋做完測試成20個鐘冇嘢落過肚，於是走去食碗雲吞面，唔知係咪落過麻醉藥，完全食唔落，一直到夜晚10點都食唔到嘢，個身又攰，冇辦法，唯有今日射波(醫生一早已吩咐及寫咗要休息)，好彩有射，因朝早仲未完全食到嘢，直到夜晚嗰餐先正常返。

暫時只知道有幽門螺旋菌，其他報告要等下星期二覆診先知結果嘞，冇事嘅，各位請放心。

撒謊的女孩

【 蘋 果 訊 】 在 被 救 出 瓦 礫 的 倖 存 者 當 中 ， 13 歲 女 孩 米 雪 ， 在 絕 境 下 被 發 現 ， 因 為 怕 救 援 人 員 不 肯 救 她 而 說 謊 。 話 說 米 雪 地 震 當 日 在 都 江 堰 市 向 峨 小 學 上 課 一 刻 ， 二 樓 的 天 花 板 突 然 塌 下 ， 65 名 同 學 霎 時 全 被 埋 ， 之 後 的 10 個 多 小 時 內 ， 米 雪 處 身 在 伸 手 不 見 五 指 的 環 境 ， 身 邊 全 是 同 學 ， 但 她 們 竟 全 不 說 話 ， 因 為 都 變 成 屍 體 了 。 米 雪 想 過 會 這 樣 死 去 ， 但 她 求 生 意 志 堅 強 ， 不 斷 扯 破 喉 嚨 呼 救 ， 最 終 聽 到 外 間 傳 來 回 聲 。


訛 稱 同 學 昏 迷 了
「 外 邊 的 人 問 我 ， 壓 的 有 多 少 人 呀 ？ 我 說 有 七 、 八 個 ， 他 們 又 叫 其 他 人 說 話 ， 我 說 她 們 昏 迷 了 ， 說 不 出 話 。 」 米 雪 事 後 在 醫 院 的 病 床 上 講 述 當 時 情 況 。 她 最 終 被 救 出 來 ， 但 救 援 人 員 發 現 其 他 64 人 已 死 掉 ， 米 雪 道 出 一 番 道 理 ： 「 我 怕 你 們 見 被 困 的 人 太 少 不 肯 救 我 ， 於 是 說 謊 。 」 米 雪 雖 然 調 皮 的 說 ， 但 她 也 知 道 自 己 的 右 腿 可 能 因 為 肌 肉 壞 死 ， 最 終 需 要 切 除 。

↑以上是我今天在報紙上看到一則關於四川大地震的報導，有些事情真的難分對錯，在此登出只是想跟大家分享分享

四川7.8級地震

『5月12日四川7.8級大地震後，震央汶川多個城鎮被夷為平地，道路及通訊中斷，當局派出直升機及傘兵空降救援，總理溫家寶 也乘直升機到汶川視察。』

在這幾日，各大報章、電視台、電台都環繞此大災難......

截至剛才電視新聞報導：官方死亡人數已增至14866人，數以萬計的人仍被困在瓦礫之中......

每次聽到有關此災難的新聞，心裡都十分難過......

梁太同大家作出呼籲，如果可以的話，請大家都伸出援手吖，以下係一啲捐款戶口嘅資料：

宣明會

匯豐銀行：018-554444-001

恆生銀行：286-364385-003

中國銀行：012-883-0-002666-2

救世軍 (捐款熱線：27832333)

匯豐銀行：580-149649-001

中國銀行：012-878-1-061887-6

東亞銀行：015-515-10-50541-3

紅十字會

匯豐銀行：567-650155-016

恆生銀行：267-175123-001

中國銀行：806-0-000161-7

東亞銀行：514-40-39966-3

樂施會

匯豐銀行：001-537000-012

中國銀行：012-874-0010515-7

聯合國兒童基金會 (捐款熱線：28336139)

匯豐銀行：507-354014-005

中國銀行：012-875-1-081085-5

永隆銀行：020-601-003-7635-2

** 以上捐款資料由都市日報轉載 ***

南生圍

4月29日，三位攝影大師：小鴻、水爺及阿威出動前往南生圍，咁好機會，我當然跟埋去啦，而同行仲有拍七及華仔，不過逗留時間就比較短，最初天陰陰，好彩稍後天色逐漸放晴，因時間所限，未能行畢整個南生圍，有機會會再來欣賞另一半景色，以下係輯錄維基百科對南生圍的介紹：

『南生圍是位於香港新界元朗區橫洲東面的地方，被東面的錦田河及西面的山貝河所包圍。南生圍的「圍」就是基圍的意思，基圍主要飼養的就是基圍蝦。南生圍原本很多基圍、魚塘及農地的地方，而村民大多在塘邊架起小木屋居住。可是自20世紀90年代中，元朗急速發展，城市化之下南生圍亦不能倖免，以致大量魚塘及農地被荒廢。相似情況出現於同區的天水圍。
錦田河與山貝河的交匯處有個小島，猶如一個雀鳥天堂。因為水退時，小島泥灘旁有很多候鳥在停留，尤其是黑面琵鷺。
2003年11月初在南生圍曾出現小灣鱷，香港政府為了市民安全，聘請澳洲「鱷魚先生」約翰·利弗及番禺鱷魚專家「鱷魚釗」前來捕捉，引發市民的好奇心，使市民注意到南生圍這個地方。期後小灣鱷被命名為「貝貝」，並被送到香港濕地公園飼養並供遊覽人士觀賞。』

觀看 本人 照片連結 請按此

觀看 小鴻 照片連結 請按此 (同場加影南蓮、尖咀靚相)

觀看 水爺 照片連結 請按此

鶴咀燈塔

橫欄燈塔



前排搵緊香港水域，一號燈塔究竟喺邊呢？今日再搜尋，相信係鶴咀燈塔嘞，好想去睇下呀.......


『建 於 一 八 七 五 年 的 鶴 咀 燈 塔 ， 是 香 港 第 一 座 燈 塔 。 燈 塔 坐 落 在 鶴 咀 半 島 南 端 ， 為 一 座 圓 形 石 塔 。 在 一 九 零 五 年 ， 燈 塔 停 用 ， 而 燈 塔 上 的 射 燈 則 被 搬 往 青 洲 燈 塔 。 一 九 七 五 年 ， 燈 塔 再 次 被 使 用 ， 並 全 面 改 為 自 動 化 操 作 。 因 其 重 要 歷 史 意 義 ， 因 而 政 府 在 二 零 零 五 年 十 二 月 三 十 日 列 為 法 定 古 蹟 。』(轉自香港地方網)

文匯報報導 連結

燈塔是什麼 連結

鶴咀要點去 連結

助語詞之運用

尋日，在巴士站排隊上車的時候，在隊中見A女士巧遇B女士及其兩女兒，A女士一見B女士隨即大叫的說：『喂！妳個女咁大個嘅？』，全巴士站的人們都將注意力放在B女士及其大女兒身上，見佢真真尷尬非常.....好慘........

於是我在想，如果當時A女士咁表達會唔會好啲呢？
『喂！妳個女咁大個嗱？』

唔知各位點睇呢？

七十一

相信係全港最細嘅7仔........

植物問題

(圖一)
(圖二)

問題一：在坪洲遇到嘅一棵樹，圖(二)嘅粒粒同綠葉係原本屬於圖(一)嗰棵樹，定抑或係一種專依附喺其他樹木嘅植物嚟呢？



問題二：在婆髻山的一棵樹，見佢甩緊皮，好光滑，佢咩名堂呢？是否甩完呢次會再甩皮的呢？




問題三：成日都行山見到嘅，叫咩名呢？

東涌至梅窩

3月29日，收工後又試新路，由東涌往梅窩：
東涌 → 薄刀屻 → 婆髻山 → 白芒 → 牛牯塱 → 黃公田 → 窩田 → 銀礦洞 → 銀礦灣瀑布公園 → 白銀鄉 → 涌口 → 梅窩
今次慢走，全程約4小時，山上花草茂盛，到處蝴蝶飛舞，鳥語花香，行經婆髻山時，適逢植樹日，迎面有不同團體由白芒帶同樹苗上山植樹，有意義。
當行至白芒村時，更一睹村外試劍石，體積比心中所想的大許多，及後到達山頂一涼亭，一邊是老虎頭，另一邊可遠望一片山巒，包括：大東山、二東山、雙東坳、婆髻山、蓮花山等等盡入眼簾，走過山頭，開始落山時，乍見雲霧剛由南至北，迎面吹來，配合山巒景色及西斜之陽光映照，好靚.........
因為下午三點才由東涌出發，當到達梅窩時已開始入黑，參觀過瀑布、銀礦洞後，便到了銀礦灣銀城吃晚飯，味道可以且頗夠份量，一試冇妨，晚飯後圍繞銀礦灣銀河散散步，再跟銀礦灣酒店拍拍照，最後到達梅窩碼頭，參觀一下李府食邑稅山界石，完成整個旅程，坐巴士回東涌去。
回顧全程，不太難行，比起東涌往大澳輕鬆一點，山景比海景略多一點，感覺良好，應該可成為日後梁太遊樂團之其中一個景點。

觀看照片連結 請按此

人食人

以上相片係我3月21日行大澳時喺碼頭偷偷拍嘅，估唔到呢個時代仲有人食人！

唉.....大家要小心呢個人呀！

赤臘角觀景山

3月23日，星期日，上咗觀景山欣賞機場全景，之後再去參觀古窯及古物園，如要行畢全程，來回都唔需要兩小時，我當然慢慢行慢慢欣賞啦，都係用咗三個多小時咋，有空抽少少時間去睇下吖，都OK，係多蚊啲，喜歡嘅話約埋我去多次都隨時奉陪。

觀看照片請按 此連結

大埔海濱公園

08年3月15日攝

佔地22公頃，位於大埔的大埔海濱公園，每日開放時間為朝七晚七，係目前香港面積最大嘅公園，設施包括單車徑、餐廳、小食亭、西式花園、自然生態花園、大草地、昆蟲屋等等，單係海濱長廊已經長1,200米，而最有代表性相信係高32米的香港回歸紀念塔，原來當年英軍接管新界的淪陷時期，就係在回歸塔位置登陸，於是香港政府便在1997年建回歸塔以紀念香港主權移交這重要時刻，而該塔更有周南先生提字。

在這麼大的公園，好容易就可讓你閒度一整天，就我所見，來聚天倫樂的、攝影的、放風爭的、踏單車的、釣魚的、放狗的、觀光的比比皆是，有時間的話，要去行下呀。

2007年梁太活動精華

雖然幾日上唔到網，不過我都冇偷懶，為大家製作咗個精華圖片集，相片包括：

7月10日蒲苔島之旅
9月17日坪洲之旅
10月12日破邊洲之旅
12月10日釣魚翁之旅

同場再加插8月22日南風灣船河、9月15日海洋公園、11月2日南丫島科水團及1月14日(08年)拍七深井之旅

梁太2007.flv

Hosted by eSnips

請雙擊上圖睇片，片長17分39秒，因片長關係，建議按"play"後先按暫停，待條bar起碼行到一半先開始睇吖，咁就順好多嘞。