錦上路站跳蚤市場及流浮山日落

平時行百貨公司或商場，覺得毫無新意，因間間商場賣的東西都大同小異，悶死人！
今天放假悠閒地到茶餐廳吃完午餐，便坐西鐵到錦上路站旁的跳蚤市場逛逛，雖然地方話大不大，邊行邊睇亦行了個多小時。細心睇睇，其中有不少有趣及精緻的物品，是一個方便的消閒地點。
行完跳蚤市場當然還有餘興，趕在昏前到流浮山觀日落。大約五時到達，逛了一會magic moment就到了，雖然有些煙霞，但個蛋黃亦相當美，不錯！
等到斜陽盡下，肚子亦餓了，在入口迴旋處找間飯店醫肚子，當然叫了蠔，今次的法是蜜汁燒蠔，外面飯店很少吃到，味道相當不錯。見其他的食客多數叫了炸生蠔，伴生菜上，包住隻蠔食，賣相不錯。當然還點了其他小菜，廚師有一定水準。叫了三碟小菜及一碟炒飯，兩口子吃還要打包回家，滿足！

(忘記了間飯店名稱，但近迴旋處巴士站只有兩間比較大的飯店，此店比較多客光顧。另外跳蚤市場只開星期六、日及公眾假期。)


觀看照片請按 此連結

** 文章及照片皆由 水爺 提供 **

西門町台灣小食

今次去咗呢間位於旺角通菜街街頭的一間地舖，共點了下列食品：

廟口魯肉飯 - HK27.00 (連冷熱飲品)

酸辣粉皮 - HK17.00 (跟餐叫，只收HK7.00)

香酥豬扒新竹米粉 - HK30 (連冷熱飲品)

紅油玉燕餃 - HK18 (跟餐叫，只收HK8.00)

香芒沙拉鳳尾蝦 - HK32.00

此餐廳選擇用黃燈暖色系，燈光柔和，座位約30多個，都幾細間，唔收加一，點菜記住睇清楚，都幾複雜，例如叫餐跟小食又有特惠價，每款減10元；跟餐咖啡奶茶冷熱唔收錢，但要鴛鴦又要加幾蚊咁嘅，好奇怪。

講返啲食物，粉皮幾醒胃、玉燕餃一般，呢兩款小食可以不理，魯肉飯就幾好味，肉碎大細啱啱好，有旦有菜有啲脆脆放喺面，值得試試。而香酥豬扒就一般，但個新竹米粉就好食喎，最後，如果大家真的到此店的話，香芒沙拉鳳尾蝦就必食嘞，我嗰碟啱啱炸起，啲蝦夠新鮮，個香芒沙拉醬又掂，唔怕熱氣就必試，推介！

兩人食，埋單找數HK104.00，略嫌貴咗啲，一試冇妨，有機會試下其他小食吖。

澳門翠苑餐廳

葡式豬扒飽餐 - HK$20元 (凍飲再加2蚊)

澳門咖哩牛柳農夫飽餐 - HK$43元 (凍飲再加兩蚊)

今次為大家介紹呢間澳門翠苑餐廳，位於旺角上海街，旺角綜合大樓2樓之熟食中心內的，十分易搵，正正喺朗豪後面。

是日叫咗兩個餐，分別係：

葡式豬扒飽餐 - 個飽幾脆，豬扒唔乾身，凍咖啡有水準，好飲！如果豬扒多汁少少就更正嘞！

咖哩牛柳農夫飽餐 - 錫紙包住農夫飽，農夫飽又包住牛柳，食嘅時候點咖哩食，農夫飽外皮香脆，裡面又煙煙韌韌咁，都幾好食，係略嫌個咖哩汁咸咗少少，杯凍咖啡唔洗再講啦，呢個餐仲有一個牛腩粒湯，呢個湯不過不失咁啦。

整體覺得食物幾好食，買完飛又有專人拎比你，農夫飽係好似貴咗啲，但係值得試試，不過最好兩人一齊食，一來可趁熱食(外皮脆啲)，二來一個人食可能會幾濟嘅，另外農夫飽仲有好多不同配搭的，例如豬柳、雞、牛腩、雜菜等等...

此外當然仲其他食品啦，如果大家試過有其他正嘢就話比我聽吖，因為我必定會再去食嘢嘅。

坤記糕品專家

前日去開深水埗，專誠去呢間坤記買啲糕品試試，共買咗三款：

白糖糕 ($4.5) - 細細舊，唔太甜，可能我本身唔太喜歡食白糖糕，感覺OK咁啦。

芝麻糕 ($6.0) - 比白糖糕大得多，有八、九層到，幾好食，鍾意食芝麻糕呀、芝麻卷之類嘅朋友仔要試下喎。

紅豆糕 ($6.0) - 比芝麻糕細啲啲，好多紅豆0架，以上兩款我都係熱熱哋食，而呢款紅豆我返到屋企凍晒都覺得好好食，各位如有緣去坤記的話，紅豆糕必食呀！誠意推介！

坤記位於北河街與福華街交界，好易搵。

物價

今日去檀島食個晏晝，坐隔離有一大班人正在午餐，八八卦卦聽下佢哋講咩，見有一位剛剛到步嘅女仕問一位已攞餐嘅男仕：

女： 咦！？做咩食五香肉丁麵呀？唔食餐肉？你唔係鍾意食餐肉嘅咩？
男： 抵啲吖嘛！而家五香肉丁成十幾蚊罐呀！

係喎！呢件事令我諗起，早幾日喺超市見到而家五香肉丁買成$16蚊罐呀！有冇攪錯呀？以前平民價$10蚊有兩罐，而家咩世界...究竟係成本貴咗？定係商家牟利重咗呢？人工又唔見加得多，唔通營商真係咁艱難？

講開檀島，順便發下嘮騷先，記得此店於機場開幕早期，合桃蛋糕同藍莓芝士包好食到不得了，不知何時開始，藍莓芝士包得番極少芝士，而合桃蛋糕比我嘅感覺係偷工減料咗，冇晒嗰隻正正蛋糕味，合桃直頭係轉咗供應商咁，整個蛋糕完全唔掂，我最初以為一時失手，之後我比咗三次機會佢，結果完全一樣，唔通又係百物騰貴嘅關係？

** 註：以上純屬個人意見，如你是檀島Fans，請多多見諒。**

樂香園咖啡室

位於中環威靈頓街的蛇竇，多年前我已經光顧，因早已不在中環上班，已很久沒有幫襯，今年有機會再到樂香園，當然食回我以往最愛食嘅雞批，雞批內有火腿及雞肉，再用忌廉湯煮成餡料混合而成，如果撞正剛剛出爐，真真美味無窮，都係買6蚊咋！
咖啡、奶茶、鴛鴦亦十分到家，熱嘅$13、凍嘅$15，略略貴咗少少，不過中環喎，差唔多啦。
店內裝修、擺設偏懷舊，連沙糖都放置在一個冇蓋嘅器皿上，感覺上有點不衛生，但舊式亦係呢度嘅風味之一呀，至於點解叫蛇竇呢？有一個說法話以往好多打工仔經常光顧及蛇王一返，真係信不信由你嘞。
講出嚟自己都唔信，一直以來，我到蛇竇只會飲杯熱鴛鴦加個雞批，而對上一次，有啲唔夠喉，於是叫咗件蛋撻，嘩！真係咪亂試呀，各位。
另外近排返查過蛇竇嘅資料，原來除雞批、什批外，炒滑蛋同蛋治都十分有名的，下次光顧必試蛋治，而且唔會烘底，因聽講話個方包都好得嘅咁話。

山東餃子館 (長沙灣)

菜單及正門
蒜茸千層餅
抄手、混合餃
煎餃及麻醬拌麵


山東餃子館，位於順寧道及東京街交畀，店舖很細，只可容納約十多人(絕對不能超過廿人)，所以在進餐期間，有不少食客外賣取走，單單餃子種類，已有13款之多，可淨餃、可配麵、可加清湯、可改為煎餃、亦可叫半客，全部即叫即製，今天我們兩人進店，點選如下：

• 蒜茸千層餅 (HK$10)，感覺如印度餅煎香，少量蒜茸味，不過不失之作。
• 紅油抄手 (HK$16)，可要求加辣，紅油雖少了點蒜香，但以此價錢有6只，味道亦OK，所以是值得一試的。
• 帶子鮮肉餃 (半客HK$13)，細細粒帶子加上豬肉製成，都係不過不失。
• 蕃薯苗鮮肉水餃 (半客HK$9)，未食過蕃薯苗的我，此餃帶來新鮮感，但沒有驚喜，合格之作。
• 金玉滿堂鮮肉水餃 (HK$18+HK$2)，因改煎餃，加了HK$2，此餃由粟米及豬肉組成，煎後香口，肉汁亦被封在餃子中，可能因此關係而令餃子略咸。
• 麻醬拌麵 (HK$15)，麻醬不糊口，拌上青瓜，熱辣辣食，竟有點像炒油麵，好滑，如你到訪此店，必食之選！
• 自磨豆漿 (HK$5 x 2)，好特別，一啲都唔甜，喜歡甜豆漿嘅朋友，唔需要叫嘞。

總結：埋單HK$93，冇諗過會食HK$9x，食之前預算HK$70以下，但好飽，餃子皮薄，細細隻，一啖入口，豬肉亦新鮮，但間中會食到微細骨碎，餃子選擇多，且配搭亦十分自由，鄰桌叫九隻紅油抄手都得，唯獨環境一般，進食期間，有小烏蠅在店中飛舞，上菜亦頗慢，餃子中上水準，麻醬拌麵必食之選。

維記咖啡粉麵 (深水埗)

早已聽聞維記以豬潤聞名，再加上早前領隊豪亦推介，尋日下午，決定一試！

維記至今，已於同一條街開了三店，主要供應，米粉、公仔麵(網友話用大光麵)、配料有餐肉、旦、香腸、牛肉、豬潤等等........另有多士、咖啡、奶茶、利賓納等一般水吧飲品，單拼粉麵HK$18，而雙拼則HK$20。而我就叫了以下兩樣：

• 潤牛米 (HK$20)
• 熱鴛鴦 (HK$10)

全場食客，九成以上會點豬潤，當服務員放下潤牛米在我面前時，我心裡在想：『嘩！個賣相咁差嘅！？』，而平時喜歡加大量調味料嘅我，今次什麼都冇加，先飲一口湯，好甜！再食豬潤，好緊張呀，喂！真係得喎！以往食嘅，會仲有少少血、少少苦、有血腥味同潺潺地嘅感覺，呢度絕對唔同，要用爽甜嚟形容，好食！牛肉同鴛鴦都一般，不過不失，另我估個湯都落咗幾多薑，因為單單喺我個碗都搵到三舊。

總結：份量唔細、價錢唔太貴、除賣相差啲外，招牌豬潤的確好味，如果你喜歡豬潤，呢間必試，如你不甚喜歡的話，維記可能會令你改觀......

沙嗲王 (荃灣)

很久以前曾經到過觀塘的沙嗲王，冇特別感覺，荃灣呢間都係第一次去，發覺它們在裝修方面，下了不少苦功，經過樓下接待大堂，先取飛仔，再乘升降機上二樓，機門一開，首先見到一個海盜坐在門前，坐位設計亦頗特別，是一個木桶來的，女仕如穿著裙的話，就冇咁方便，因為要提起腳才可入坐的啊。而今日都係兩人進餐，點了以下菜式：

• 自選至潮套餐 (HK$42) - 有好多款，我哋選咗鮮茄芝士焗餃子(6隻)、脆蝦棒(半份)、凍奶茶，可能因為我喜歡食蕃茄同芝士的關係，覺得個餃子都幾得，蝦棒亦過得去。
• XO醬炒蘿蔔糕 (HK$39) - 不過不失，XO醬少咗啲，蘿蔔糕啲蘿蔔唔夠多，但勝在剛炒起，熱辣辣，況且以呢個價錢，份量又唔細，其實係值得食嘅。
• 椒鹽魔鬼魚 (HK$19.5) - 完全冇椒鹽味，魔鬼魚又冇味，下次唔會再叫。
• 芝焗一口貝 (HK$29) - 共8隻，扇貝頗細隻，味道都OK嘅。

總結：埋單 HK$143，但我哋有 HK$16 Coupon ，實際只係 HK$127 ，加上凡惠顧20元，就可以有 $2 Coupon 比返你下次用，呢次我哋就拎返 12 元 Coupon嘞，價錢方面都OK吖，裝修幾特別，食物種類多選擇，雖然用料一般，但勝在即煮即上，熱辣辣，抵消晒，要批評嘅係服務員都幾大頭蝦，單單上錯菜到我哋張枱都有四次之多，可能多人客掛........ 總括而言，係值得去光顧嘅，起碼我會再去。

Outback (愉景新城)

正門
周打魚湯及洋蔥湯
12oz 肉眼扒 加 四燒蝦 (主菜)
芝士薯條 (前菜)
黑麥包

位於愉景新城的Outback，主打澳洲菜，今晚兩個人點了以下食物：

1. 黑麥包 (免費) - 唔需要叫的，點好菜，服務員就自動奉上，個包暖暖哋，甜甜哋，未搽牛油已經幾OK，搽完牛油，仲好味道，推介。
2. 芝士薯條 (HK$56) - 薯條(連皮)炸好加上芝士及煙肉，另有沙律醬比你點，開始食覺得唔錯，食食下就覺得好『漏』下。
3. 12oz安格斯肉眼扒 (HK$236) - 原本HK$216，我叫咗個HK$236嘅就多四隻燒蝦，另外有個洋蔥湯、任選兩款伴菜，我哋選咗甜蕃薯及什菜，肉眼扒七成熟，好新鮮，但味道只覺一般，四隻燒蝦就非常好味嘞，咸咸哋又夠惹味，正！什菜用牛油炒，OK啦，甜蕃薯就出奇地咁好味喎，好甜好好食。
4. 周打魚湯 (HK$36) - 因為個餐只得洋蔥湯，所以叫多一個周打，料好足，不過咸咗啲，同洋蔥湯比較的話，洋蔥湯更勝一籌。

總結：環境幾好，服務員有禮，其他食物比扒好味道，前菜除芝士薯條外，仲有炸洋蔥、磨菇等，但兩個人食的話，真係幾『漏』，建議起碼有四個人以上先好去食，今次埋單連加一共銀 HK$360.80 ，略略貴咗啲啦，不過好飽，啲嘢都未食晒就走嘞。

另外，呢間 Outback 除咗係扒房，仲係一間酒吧嚟。

食棧海鮮宴

雖然球隊今日輸零比一，計得失球後，UwillPay 被踢出局，下年再接再厲，因為輸贏唔重要，只要我哋一班人開開心心踢我哋嘅開心足球就足夠嘞！

踢完比賽，我哋一行十七人浩浩蕩蕩，到了樂富食棧海鮮酒家，十七人坐埋一張枱，正！

以下係今餐嘅菜單：

大花龍蝦伊麵
大石倉兩食(炒球及魚粥)
豉椒炒大竹聖
果皮蒸大鮑魚
椒鹽賴尿蝦
薑蔥焗羔蟹
惹味魚湯(美國蠔+象拔蚌)
至尊燒鵝
海皇焗飯(大家都飽嘞，所以冇上呢樣)
楊枝甘露
芒果/榴槤班戟(呢樣送嘅)
汽水/啤酒任飲

可能因為一班人食嘅關係，今日覺得樣樣都OK喎，而我就較喜歡個魚粥、燒鵝汁同賴尿蝦，要彈就彈啲蝦細隻啲唧，仲有，比較特別嘅係楊枝甘露放咗冰，食落凍凍哋都幾過癮，正！

另外在此要特別鳴謝 經理占 統籌，領隊豪 協辦，攪咗呢餐又豐富、又好味、又滿足嘅海鮮宴比我哋呢十五兜友仔食，多謝你哋呀！

銅鑼灣喜記

8月15日晚，本想到銅鑼灣品嚐日本燒餅的，誰不知，6點45分到達，仍未開舖，於是四處行下搵食，發現呢間喜記，門外貼滿名人到訪照片，於是入內一試.......

睇餐牌，一般小菜大概HK$40~HK$80，感覺......差不多啦，唔係太貴啫，再睇睇鄰近食客點什麼菜，發覺大多都有點蟹，想必是招牌菜式，於是問價(時價)，嘩！大家估下上圖嘅避風塘炒辣蟹(約兩斤)要幾錢？係HK$480呀！當時我嘅諗法係人一世物一世，叫啦！足料、夠辣、好惹味，蟹質實在，蟹肉亦鮮甜，係幾好食嘅，不過價錢就...........食過一次就夠喇。

另外再加蟹油炒麵(HK$40，味道好普通，仲燶燶哋咁)、茶介(炸魚仔幾好味)、加一，埋單一共六百一，起碼半年冇得去食貴嘢嘞，嘻嘻..............


註：店舖好細，大約只有十張枱，服務態度麻麻，一啲都唔高級，但係招牌菜就超貴，一隻避風塘瀨尿蝦當日時價要HK$180..........

羅富記(中環)

到羅富記原因，主要係好多年前已聽聞佢嘅炸魚球十分出名，今日當然要試試：

鮮牛肉粥........HK$19

豬肝牛肉粥.....HK$23

小欖炸魚球.....HK$20

兩碗粥先到，粥夠滾，豬肝同牛肉上枱時仍有血，等一會後便熟了，粥底甜甜地，幾得意，食後頗口渴，相信味精不少，不久，主角炸魚球嚟嘞，剛剛炸起，熱辣辣，魚肉冇細骨，完全冇腥味，OK，但又不至於一食難忘，店員服務態度幾好，整體評語，合格。