香港海防博物館

上星期三，本人參加咗『威水攝影團』嘅活動，就係去咗呢度，香港海防博物館：

香港海防博物館佔地34,000平方米，改建自逾百年歷史的鯉魚門砲台。1941年日軍攻打香港時，該處曾發生激烈戰鬥，不少守軍壯烈犧牲。

博物館主要由堡壘和古蹟徑組成。堡壘建於1887年，是一座頗具規模的英軍防禦設施；內有18間地下室，原用作營房、彈藥庫、砲彈裝配室及煤倉。堡壘中央的露天廣場是士兵集散的地方。修復後的堡壘頂部加建了大型帳篷，陳列以香港海防歷史為主題的常設展覽。至於戶外古蹟徑，則保存當年的設施，包括壕溝、魚雷發射站、溝堡、官兵營房、砲台及地下彈藥庫等。

海防博物館每日 10:00 至 17:00 開放，逢星期三免費，星期四休息，入場費HK$10，而當天因為約咗小鴻，只係逗留了兩個多小時，有好多展覽廳都冇入，停留拍攝時間都很短，不過覺得呢個地方係值得去參觀下嘅，順帶一提，裡面有餐廳、洗手間、室內地方更有冷氣，幾舒服架。

如欲觀看 小馮 照片，請按 此連結

如欲觀看 水爺 照片，請按 此連結

玩個遊戲吖

以上圖片由戰地記者提供，想同大家玩個遊戲，兩個問題有待各位解答：

1. 圖中三位仁兄喺度做緊咩呢？
2. 由左至右，各位憑背影又認唔認得出呢三位仁兄係邊個嘛？

鳳凰之顛 - 黑葉伴遊篇

鳳凰山：
山有兩峰，主峰(鳳)高934米，副峰(凰)高900米，是香港第二高山。其形如鳳凰展翅。遠望山頭崩爛，又稱爛頭山，英文名稱 Lantau Peak 由此而來，另因似雛鴉待哺，故又名鴉雀口山。

今日雖然無落雨，但密雲，一早起床，思前想後，終於等到11點半都忍不住要致電黑鬼葉，到鳳凰山一遊！全程共用了3小時，而行程如下：

伯公坳 → 牛塘坳 → 南天門 → 鳳凰山頂 → 天梯 → 心經簡林 → 昂平

此路段乃鳳凰徑第三段，全長4.5公里，由東涌坐車到達伯公坳入口，對對手錶 - 13：50，出發！最初一段，有點似曾相識，與往大東山路段頗相似，一路往上...一路往上，好快就到了紀念牌匾，心裡想，都不太難行，但一路行，上斜、落斜、再上斜，發覺要上山頂，真真唔係一件易事......當到達牛塘坳的涼亭休息時，翻開地圖睇睇，正！最辛苦嗰段已過！當然又估錯啦，難度只有增而無減，繼續要上石級、碎石路、石級、碎石路，好不容易才到達南天門，不知是否之前已經消耗不少體力，我覺得由南天門上山頂是全程最辛苦的，15：45 我倆終於到達山頂，即大約用了兩小時，沿途風景十分美......如果我哋睇得到的話......點解咁講？因為今日密雲，整段旅程都被濃霧包圍，能見度最差時，連前路10米內都不能看見，上面貼的照片都係咁啱喺濃霧中看見遠景時火速拍低的，講返到達鳳凰山之顛，心情真的莫名興奮，好開心好開心，終於征服咗鳳凰山，終於都到達山頂喇！正！感覺非常正！

鳳凰山頂，比我想像細得多，有一個避風亭，我入過，其實都好大風.......我們逗留了約15分鐘，落山往昂平，從山頂起點觀看此路段，好恐怖，感覺好危險，因濃霧關係，石級頗濕滑，和黑鬼葉商量後，決定不走回頭路，繼續由此路往昂平去也，此路名為天梯，翻查紀錄原來共有約1200級，石級頗為大級(如要由下而上，有些石級大概要提腿至心口位置)，沿途有些路段設有欄杆，有些郤沒有，此段比我感覺頗為危險，行了大約50多分鐘便到達了心經簡林，但落大石級、濕滑、因危險而步步為營、落山令雙腿尤其是令膝頭承受不少壓力、再加上肚仔開始餓，呢50幾分鐘，足足好似行咗個半鐘一樣！

到達昂平即往茶園醫肚，點知已收檔！唔係掛，5點幾就收檔？好彩在天梯途中有停低，每人食咗兩片排包，諗返呢兩片排包真係好好味道，可能我哋真係好肚餓......到達昂平巴士站，我哋都八八卦卦抬頭望望天壇大佛......都係睇唔到，只見梯級，梯級頂只係白朦朦一片，你話有幾大霧呢？

觀看 小馮 照片連結 請按此
觀看 鳳凰山 星華篇 請按此

總結：雖然濃霧，美景欠奉，但能登頂仍是十分興奮的，此路段比大東山及釣魚翁辛苦，但相對於大東往南山一段，又比較安全，所以我覺得如果要睇日出，由伯公坳上大東山較為合適，睇完日出後再由原路回伯公坳坐車返東涌較為安全。

另外要多謝黑鬼葉肯陪我呢個癲佬上鳳凰山，多謝你！

心臟復甦機

今日行經葵芳新都會，發覺在顧客服務處旁邊加裝了上圖呢部自動心臟復甦機，最正係有指示教埋你要點操作，可能你/妳早已經見過，但我覺得應該貼比大家睇睇，請認住佢，當有需要時可以幫到別人，真希望日後各大商場、公眾地方、港鐡車站、甚至更多地方都會裝上一部就最好嘞！

東涌日落

下晝接到小鴻電話，話今晚天色靚，有機會影到咸旦黃，雖然我部單鏡拎咗去整，但用富士都一樣，可惜去到嗰個地方個境咁啱比座大廈頂住......影唔到太陽伯伯較低嘅位置，又冇時間去過另一個地方，於是都影低先，影就影得差啲，都同大家分享下吖。

沙螺洞、鶴藪探路之旅

簡介：

沙螺洞，佔地逾80公頃，整個山谷被八仙嶺環抱。二、三十年前，居民以務農為生，稻田荒廢後被政府列為二級古蹟。由於地處高地，山谷河流不受污染，孕育出多種野生動物。據估計，這裡有百多種草藥品種，六百多種植物，百多種雀鳥，並曾發現野豬，果子狸等野生動物。河裡有多種淡水魚，更有稀有品種的蜻蜓和蝴蝶。

目的：
今次探路原因，主要因為側聞沙螺洞在往後幾個月可欣賞得到螢火蟲，小弟發現一個有機會觀賞到嘅地點，位置大概在『大炮亭』附近，如果大家都有興趣睇螢火蟲的話，請留言或聯絡華仔或我吖，時間容後再公佈。

今次探路行程：

大埔 → 沙螺洞 → 張屋 → 鶴藪家樂徑 → 鶴藪水塘 → 鶴藪排

尋日，原本已相約好殺手、小鴻及粉葛，一行四人到沙螺洞探路去也，點知等極個天都係落雨，一路都冇好轉跡象，到12:00左右仲收到小鴻來電，話九龍區行雷添，所以決定取消行程，同殺手及粉葛去食啲嘢然後解散，食完嘢後仍然落住微雨，殺手離開，我同粉葛心想都帶齊架生，喺中上環影一陣都好啦，誰不知影影下出太陽，於是兩兜友胆粗粗，照往沙螺洞去也。
15：20於沙螺洞路正式出發，到達大炮亭時間為17：05，但係我哋行下停下，相信如果剩去此點睇螢火蟲的話，約一小時即可到達。17：30 我們到達下一個景點：沙螺洞村，此村已經荒廢，但仍有惡犬把守，大家睇相時記緊留意一隻啡狗，長得十分似熊，此狗足以令我們不敢進村。18：20到達鶴藪水塘，景色好靚，可惜的是我們到達時已接近天黑，所以未有環塘一遊。行畢全程後，在鶴藪排乘坐52B專線小巴($4.8)到粉嶺完成整日行程。
回想今次呢條路線，初段上斜路到2百多米高地，跟住為一片綠草平原，再接就是石路落鶴藪水塘，全程用了4小時，輕鬆易走，唯需留意早及尾段十分多蚊，及落鶴藪的石路頗多青苔，因今次剛下完雨水，路面較為濕滑，我倆都步步為營，小小心心慢慢落山，另外，此處遠景、海景欠奉，主要係林景、山景同水塘，但昆蟲、蝴蝶、蛾、花、植物及雀鳥等等就多的是，本人覺得值得一遊。


觀看 本人 照片連結 請按此

觀看 粉葛 照片連結 請按此

南生圍

4月29日，三位攝影大師：小鴻、水爺及阿威出動前往南生圍，咁好機會，我當然跟埋去啦，而同行仲有拍七及華仔，不過逗留時間就比較短，最初天陰陰，好彩稍後天色逐漸放晴，因時間所限，未能行畢整個南生圍，有機會會再來欣賞另一半景色，以下係輯錄維基百科對南生圍的介紹：

『南生圍是位於香港新界元朗區橫洲東面的地方，被東面的錦田河及西面的山貝河所包圍。南生圍的「圍」就是基圍的意思，基圍主要飼養的就是基圍蝦。南生圍原本很多基圍、魚塘及農地的地方，而村民大多在塘邊架起小木屋居住。可是自20世紀90年代中，元朗急速發展，城市化之下南生圍亦不能倖免，以致大量魚塘及農地被荒廢。相似情況出現於同區的天水圍。
錦田河與山貝河的交匯處有個小島，猶如一個雀鳥天堂。因為水退時，小島泥灘旁有很多候鳥在停留，尤其是黑面琵鷺。
2003年11月初在南生圍曾出現小灣鱷，香港政府為了市民安全，聘請澳洲「鱷魚先生」約翰·利弗及番禺鱷魚專家「鱷魚釗」前來捕捉，引發市民的好奇心，使市民注意到南生圍這個地方。期後小灣鱷被命名為「貝貝」，並被送到香港濕地公園飼養並供遊覽人士觀賞。』

觀看 本人 照片連結 請按此

觀看 小鴻 照片連結 請按此 (同場加影南蓮、尖咀靚相)

觀看 水爺 照片連結 請按此

大東山

大東山，高869米，為香港境內第三高峰，尋日早上觀察過天色，持續放晴，放工後決定相約星星仔一同往大東進發去也，今次行程：

伯公坳 → 大東山 → 繞二東山及雙東坳 → 南山郊野公園 → 嶼南道

2點33分到達伯公坳，開始旅程，而今次正正是鳳凰徑第二段，全長約6.5公里，一開始全程向山上，斜度一般，一直向上爬確需要一定體力，但每高一點，視野愈是遼闊，對望鳳凰山、遠眺分流、籮箕灣、索罟群島全景、石鼓洲、南丫島、長洲、喜靈洲、周公島、坪洲、交椅洲、香港島南面，通通盡收眼底，可惜昨日始終能見度偏低，如能見度高的話，相信就連遠至蒲苔島都可以見到。上到接近山頂，地勢開始偏於平坦，而風勢亦比較大，十分清涼，向前行了不久，望向遠方見十多間石屋，原來已經到達大東著名景點『爛頭營』，石屋群比我嘅感覺好似去咗荷蘭、丹麥咁，好有特色，但我們參觀了兩三間石屋後，天氣開始轉變，先是一片大霧由北面湧至，好壯觀，五分鐘內，180度由天晴轉為微雨，於是我們二人便決定要用較快速度下山去，沿途快快參觀石屋，影相也是急急的，過了爛頭營，進入二東山段，雨勢愈來愈大，我們連相機都要收起，連忙趕路，上山辛苦、而落山就危險，因為有些路段頗險峻，石面有青苔、地衣等，加上雨水後令石頭變得十分濕滑，沿路更滿佈碎石，真是稍有差池，後果不堪設想，當時又要擔心太慢落山，又會天黑，我同星星仔終於領會到，什麼叫做『千祈唔好急，但係要快』嘅道理............ ，6點13分，我們到達南山郊野公園嶼南道出口，完成今次旅程，全程共用上3小時40分，心情好興奮，唯落山一段全程皆被雨水、霧水籠罩，未能為大家拍下照片，實是可惜，但今次體驗對於我們兩人確是難得且難忘的。

而旅程當中有一些小插曲：

1. 明明知道前面有一隻『大鳥』，因逃避我倆而走入樹叢，又明知佢會無啦啦飛出嚟，但係當佢真係飛出嚟嘅時候，我哋都仍然『嘩』咗出嚟，嚇一嚇。
2. 路上遇上一條蜈蚣，雖然唔大條，但係佢紅色嘅部分係鮮紅色嘅，一般我見過嘅只係暗紅色的，呢條蜈蚣比我感覺佢好毒..............
3. 在南山的某段路上，當時星星正用行山竹篤吓篤吓之際，我見到有一條類似青竹蛇喺星星仔後面橫過，我當然大嗌話佢知叫佢急急繼續前行，我就等條蛇大哥完全離開，先夠胆行過，驚驚！

縱觀今次旅程，雖然辛苦，但好興奮、有體驗、有得着，多謝星星仔！

觀看 小馮 照片請按 此連結

觀看 星星 照片請按 此連結

** 資料補充：網上查過，原來爛頭營的由來有另一個說法，可到 此連結 睇睇，至於邊個係真，我就唔清楚嘞。至於當中18號石屋裡面的相片，則可往 此連結 **

上環

放假去咗上環，影下相、食下嘢，而家先發覺原來上環幾特別，新舊建築並存、華洋交雜、遊客眾多、有好長嘅樓梯、有好多嘅廟宇........ 呢次影得好少相，因為影影下開始落雨，相片已經放咗落相簿同大家分享下，如要睇睇，請按 此連結 吖。

青衣花園

原本今日約定小鴻及水爺一齊去青衣上山影日落兼青馬大橋夜景，但小鴻臨時有事甩底。
反正帶齊腳架，我同水爺當然會照去啦，誰不知出發前天陰陰又密雲，唯有取消上山，改去青衣花園影下相，好彩都有啲收獲。

觀看本人照片請按 此連結
觀看水爺照片請按 此連結

七十一

相信係全港最細嘅7仔........

植物問題

(圖一)
(圖二)

問題一：在坪洲遇到嘅一棵樹，圖(二)嘅粒粒同綠葉係原本屬於圖(一)嗰棵樹，定抑或係一種專依附喺其他樹木嘅植物嚟呢？



問題二：在婆髻山的一棵樹，見佢甩緊皮，好光滑，佢咩名堂呢？是否甩完呢次會再甩皮的呢？




問題三：成日都行山見到嘅，叫咩名呢？

東涌至梅窩

3月29日，收工後又試新路，由東涌往梅窩：
東涌 → 薄刀屻 → 婆髻山 → 白芒 → 牛牯塱 → 黃公田 → 窩田 → 銀礦洞 → 銀礦灣瀑布公園 → 白銀鄉 → 涌口 → 梅窩
今次慢走，全程約4小時，山上花草茂盛，到處蝴蝶飛舞，鳥語花香，行經婆髻山時，適逢植樹日，迎面有不同團體由白芒帶同樹苗上山植樹，有意義。
當行至白芒村時，更一睹村外試劍石，體積比心中所想的大許多，及後到達山頂一涼亭，一邊是老虎頭，另一邊可遠望一片山巒，包括：大東山、二東山、雙東坳、婆髻山、蓮花山等等盡入眼簾，走過山頭，開始落山時，乍見雲霧剛由南至北，迎面吹來，配合山巒景色及西斜之陽光映照，好靚.........
因為下午三點才由東涌出發，當到達梅窩時已開始入黑，參觀過瀑布、銀礦洞後，便到了銀礦灣銀城吃晚飯，味道可以且頗夠份量，一試冇妨，晚飯後圍繞銀礦灣銀河散散步，再跟銀礦灣酒店拍拍照，最後到達梅窩碼頭，參觀一下李府食邑稅山界石，完成整個旅程，坐巴士回東涌去。
回顧全程，不太難行，比起東涌往大澳輕鬆一點，山景比海景略多一點，感覺良好，應該可成為日後梁太遊樂團之其中一個景點。

觀看照片連結 請按此

人食人

以上相片係我3月21日行大澳時喺碼頭偷偷拍嘅，估唔到呢個時代仲有人食人！

唉.....大家要小心呢個人呀！

赤臘角觀景山

3月23日，星期日，上咗觀景山欣賞機場全景，之後再去參觀古窯及古物園，如要行畢全程，來回都唔需要兩小時，我當然慢慢行慢慢欣賞啦，都係用咗三個多小時咋，有空抽少少時間去睇下吖，都OK，係多蚊啲，喜歡嘅話約埋我去多次都隨時奉陪。

觀看照片請按 此連結

東涌至大澳 (二)

3月21日，由東涌出發步行往大澳，如有跟開梁太文章嘅，應該記得半年前我曾經行過此段路 (重溫請按此連結)，而今次再去係基於兩個原因：

• 1. 上次尾段因天黑趕路，根本未睇清此段路的風景；
• 2. 港珠澳大橋已拍板興建，此處將會被改變........

路程同上次相若，所以不多加叙述，同上次唔同嘅，係在深屈繞過象山到大澳一段時候，發現全個山頭被燒到光脫脫..........黑晒！

仲有上次行咗4小時15分，而我今次就放慢晒腳步，結果足足行咗6個幾鐘。

照片連結 請按此

夜景試拍

呢排學人玩下攝影，啱啱喺東涌試拍夜景，貼比大家睇睇吖。

大埔海濱公園

08年3月15日攝

佔地22公頃，位於大埔的大埔海濱公園，每日開放時間為朝七晚七，係目前香港面積最大嘅公園，設施包括單車徑、餐廳、小食亭、西式花園、自然生態花園、大草地、昆蟲屋等等，單係海濱長廊已經長1,200米，而最有代表性相信係高32米的香港回歸紀念塔，原來當年英軍接管新界的淪陷時期，就係在回歸塔位置登陸，於是香港政府便在1997年建回歸塔以紀念香港主權移交這重要時刻，而該塔更有周南先生提字。

在這麼大的公園，好容易就可讓你閒度一整天，就我所見，來聚天倫樂的、攝影的、放風爭的、踏單車的、釣魚的、放狗的、觀光的比比皆是，有時間的話，要去行下呀。

08年維園花展

3月14日，一年一度花展又開始喺維園舉行嘞，今年係我第一年去，同行有三個已經去過嘅小鴻、水爺同阿威，我去嘅原因當然係跟三位高手學下攝影技術啦，尋日我係最遲到嗰個，都影咗3個鐘先走，有好多種類好多唔同國家嘅品種，連非洲都有......我估我都睇漏咗好多好多，入場只需 HK$14，買本場刊都係 HK$15 (我冇買)，其實幾值得去睇下，不過佢哋話今年啲花比往年快凋謝，唔知係咪同天氣有關呢？

欲觀看小馮照片連結 請按此
欲觀看水爺照片連結 請按此
欲觀看阿威照片連結 請按此
欲觀看小鴻照片連結 請按此
欲觀看美美照片連結 請按此

機場二號客運大樓

可能時常都用快步路過，覺得2號大樓冇咩特別，但早兩個星期在此停留下來，發覺原來係幾靚......有時間你都放低急速嘅步伐，停低欣賞下別人用心的設計吖。