貼身保安系統

• 女仕們要好好保管密碼；
• 男仕們要好好學懂解碼。

Feel Good INC.

GORILLAZ 約兩年前作品，好正！

蝦哥囡囡

友情連結中加咗條 link，『蝦女成長路』，相信大家都知係邊位個千金嘞，得閒去睇下呢個出世重9.9磅嘅巨B啦。
另外亦喺度恭喜蝦生蝦太弄瓦之喜，祝囡囡健健康康，快高長大讀書叻。

錦華粥粉麵

今日繼續大埔覓食之旅，走入綜合大樓熟食中心，經過錦華，一貌似老闆娘嘅中年女仕向我喊道：「坐，睇下食咩，好食嘅喎！」就係咁，我就真係乖乖咁坐低嘞........

1. 免治牛肉粥 --- $12
2. 芽菜炒米粉 --- $ 6
3. 鮮蝦腸粉 ------ $12

以上就係我今日點嘅「菜式」：

• 先講碎牛粥，牛肉幾夠味，比較撈得少炸米，味精唔少，但就似足以前街市、大排檔嘅粥品，碎牛嚟講算係幾好嘞；
• 炒米粉，普普通通，但一定唔難食，反而想講係佢哋好細心，米粉比客人前，會先落鑊返炒先上碟，熱辣辣比你食，抵讚，仲有，佢哋嘅辣椒醬好獨特，叫做幾辣嘅，有啲酸酸哋咁，都辣得幾過癮；
• 鮮蝦腸粉，最好食係呢個，即叫即做，蝦新鮮，但梗冇酒樓嗰啲咁大隻，腸粉好滑好滑，好好食，嚟到記得必食腸粉，正正正！

因為我嗌咗兩碗碎牛(兩人食)，找數共銀 $42，唔貴，可能係食粥嘅關係，唔夠飽，臨走同老闆娘吹咗兩句，問佢餐牌上有個叫『春風得意腸粉』係咩嚟？佢就話我知今日已經買晒，而個做法係用廣東春卷皮包住啲齋拎去炸，炸完再用腸粉包住完成咗嘅齋春卷，好脆口咁話，唔........下次要早啲嚟試下先得。

又學多樣嘢

如果大家有睇我被影超速駕駛文章嘅朋友仔，你都會發覺文中嘅駕駛速度係有一個「遞減值」，目的係減少爭拗，我所獲得嘅遞減係 4 km，問題係：究竟點計出嚟呢？風速？路面狀態？於是......我就此事致電問過交通部，得出嘅結果原來十分簡單：

• 超過限制時速而被影的時速是等如或低過 100 km 的話，遞減值：4 km ；
• 超過限制時速而被影的時速是等如或高過 101 km 的話，遞減值：5 km。

係咪好易計呢？

終於中咗招

唔知係咪呢排影得人哋相多(做食評)，今日返到屋企，收到警務處信件通知，本人涉嫌於5月12日違反交通規例，『駕駛超速限定速度：100(96) / 80 偵察車速(遞減後) / 限制時速』，即係超咗16 km ，多數要扣三分 + $450 罰款嘞.........
唉.......呢次係我自舊年8月8日違例泊車罰款 $320 之後 (駕駛生涯的第一張告票)，另一張，亦係第一張被影超速相同扣分嘅告票..........所以我覺得應該喺度記低佢..............唉............

鐡路博物館

喺香港鐡路博物館影咗啲相，擊入去睇下啦，留意有一幅係『請讓位與傷殘者』，我而家先知係用《與》，而唔係用給予的《予》嘅，有冇人知呢兩個字係咪相通嘅呢？

註：5月15日經搜尋後，得出答案是『給與、給予這倆個字本身沒有太大的區別，如果在做語文題的時候，你可以根據具體的含義語境來確認，比如“給與”大多數指的是物質上的，給點什麼東西的；而“給予”多指的是精神上的，給點幫助什麼的。』