7月19日，上午11點，到達舊山頂道1號
嘉諾撒醫院，因為是下午3點才安排做手術，所以兩點前預備妥當(消毒水沖涼及換上手術服)在病床等候就可以，一辦完入院手續，到床位放低物品後，即落樓四處行下，整間醫院較舊，房租包膳食，地下有兩間餐廳，好貴但有幾台電腦可供上網，有些房間更設有WiFi服務，我住嗰間就冇嘞，因為最平嘛，另外各房間都有電視睇，電動床，召喚鐘等等，姑娘幾好人兼盡責，喺度要多謝佢哋嘅照顧，呢次發覺原來照顧病人要有好大嘅忍耐力先得，醫護工作真係好辛苦！
今次有兩個驚喜，都係主診比我嘅：
第一個係12點幾當我在醫院週圍行緊嘅時候，收到姑娘電話，內容係手術時間改咗下午兩點做，要立即上病房準備...... 吓！？ 真係諗都冇諗過手術都可以提早嘅！
第二個係主診同我講解多次手術詳情『......，失敗率係三萬分之一，如失敗會即時修補，呢次手術係要開五個窿......』吓？唔係四個窿咩？← 我個心係咁諗，但係到呢個地步4個5個都要做啦，係有少少驚喜姐...
接近兩點左右推入手術室，麻醉師先喺我左手吉一吉，跟住同我講『唔好意思，呢邊搵唔到，要喺右手試過！』，好彩右手成功，當麻醉師注射咗麻醉液再比個氧氣罩我吸唔夠十秒後，我已經冇晒知覺，醒返已經做完，出返病床大概五點幾，主診話手術好成功，大約做咗3小時。
因為我做食道手術關係，由17號開始就要食流質食物，19號早上9點後更加連水都不能飲，做完手術返嚟，成身好痛好痛，落完麻醉又不能飲水，冇咩好做，唯有瞓覺，但咁鬼痛，點瞓呢？好彩主診叫姑娘幫我打枝止痛針，不過都痛咗我成粒鐘先瞓到。
手術當晚瞓醒第一件事睇下身上多咗啲咩：
1. 右邊鼻孔有條喉一直插到入胃，不斷抽緊藍色液體(藥水)出嚟；
2. 左腰有個球狀物體經一條喉駁入傷口入面抽瘀血；
3. 右手臂有個落藥口，加一條喉用嚟吊鹽水嘅。
7月19日晚，全晚都痛，瞓得都好差，落唔到床，小便都係用尿壺攪掂咋，慘！
7月20日早上，主診再嚟，比咗淡清水我試，問咗啲問題，先拆條鼻喉，舒服晒 ~ 再同我講可以試下食白粥水，結果午餐同晚餐都係食粥水，又少又稀，不過好過冇啦！下晝我試過落地行下，終於自己行到，雖然仲痛緊，但起碼去到廁所吖。
7月21日因上午要照 X 光，所以前一晚12點又要禁食禁飲水，早餐連粥水都冇得食，呢次 X 光目的係要知道手術是否真的成功，但係吊住鹽水、腰間有個瘀血波，照嘢真係唔方便！約11點幾完成返病床，立即通知姑娘照完喇，晏晝記住預我，嘩！正呀，雖然今次呢個午餐都係粥水，但係係有味嘅粥水呀(用肉煲然後只要粥水)！好味道呀！食完個午餐冇問題後，姑娘幫我拆埋條鹽水喉，即刻行動方便晒，到晚餐，仲正，啲粥係有米有肉碎嘅，好好好正呀！
晚餐前，姑娘連個瘀血波波都幫我收埋，全身剩底嘅一個打針口就喺當晚凌晨點幾拆埋，應該係因為主診晚上約11點嚟睇過我仲同我講：聽朝我嚟多次，冇特別就出得院喇。
7月22日經主診睇過後，確定我可出院回家喇，知道可以返屋企，原來心情會好開心嫁！
現在傷口仲有少少痛，未出得街住，另外兩星期內除要戒口外，亦唔可以食太硬嘅食物，要較軟身或近乎流質，因為喉嚨傷口個膜好薄，太硬驚會整穿，個薄膜完全生埋約需6星期，但頭兩個禮拜要特別小心。
最後多謝各位梁太之友對本人之關心，多謝各位，好快會返嚟見你哋，好掛住你哋呀！
再一次借此篇文章多謝嘉諾撒醫院仝人、特別係照顧過我嘅醫護人員、主診劉雄外科醫生、麻醉師、替我做動力測試嘅梁醫生、宏康醫學診斷中心仝人(中環化驗所)、中環太子大廈卓健醫療中心仝人，多謝你哋對我嘅照顧，多謝！
