又學多樣嘢

如果大家有睇我被影超速駕駛文章嘅朋友仔，你都會發覺文中嘅駕駛速度係有一個「遞減值」，目的係減少爭拗，我所獲得嘅遞減係 4 km，問題係：究竟點計出嚟呢？風速？路面狀態？於是......我就此事致電問過交通部，得出嘅結果原來十分簡單：

• 超過限制時速而被影的時速是等如或低過 100 km 的話，遞減值：4 km ；
• 超過限制時速而被影的時速是等如或高過 101 km 的話，遞減值：5 km。

係咪好易計呢？

終於中咗招

唔知係咪呢排影得人哋相多(做食評)，今日返到屋企，收到警務處信件通知，本人涉嫌於5月12日違反交通規例，『駕駛超速限定速度：100(96) / 80 偵察車速(遞減後) / 限制時速』，即係超咗16 km ，多數要扣三分 + $450 罰款嘞.........
唉.......呢次係我自舊年8月8日違例泊車罰款 $320 之後 (駕駛生涯的第一張告票)，另一張，亦係第一張被影超速相同扣分嘅告票..........所以我覺得應該喺度記低佢..............唉............

鐡路博物館

喺香港鐡路博物館影咗啲相，擊入去睇下啦，留意有一幅係『請讓位與傷殘者』，我而家先知係用《與》，而唔係用給予的《予》嘅，有冇人知呢兩個字係咪相通嘅呢？

註：5月15日經搜尋後，得出答案是『給與、給予這倆個字本身沒有太大的區別，如果在做語文題的時候，你可以根據具體的含義語境來確認，比如“給與”大多數指的是物質上的，給點什麼東西的；而“給予”多指的是精神上的，給點幫助什麼的。』

提提您，又加油價

轉貼自雅虎新聞：

2007年5月11日 :
蜆殼石油由午夜起加價，柴油每升加0.18元，無鉛汽油每公升加0.25元。
蜆殼超勁無鉛汽油，新價每公升13.48元，V能量無鉛汽油每公升14.33元，柴油每公升為8.74元。

2007年5月12日:
繼蜆殼加價後，加德士亦宣布調高汽油及柴油價格，其中汽油每公升加0.25元，柴油加0.18元。
加德士將於午夜起加價，白金無鉛汽油每公升新價是14.31元，黃金無鉛汽油是13.49元，超低硫環保柴油8.75元。


經過又要入油嘅，咪入咗先囉，慳得一蚊得一蚊嘛。

個部落改咗中文名嘞 ！

因本部落由原本只有學泰文之文章逐步轉營為更多元化，所以現將中文名稱為 梁 太 ，英文名繼續係『Learn Thai』，網站地址不變，當然，亦會定時更新學泰文課程，與及編寫更多有趣文章，歡迎各位連結，請多多到訪，最後，希望各位喜歡本部落啦。

糖宮

今日下晝五點幾，突然好想食糖水，但又差不多到晚飯時間，經過九龍城衙前圍道，見到呢間糖宮，有糖水、有甜品、有米線、有砵仔飯、又有小食，正合心意，坐低點菜，除咗一張雙面傳統文字Menu外，仲有一串圖片介紹，好！嗌嘢！

• 秘製豬軟骨米線($22) 加 喳咋($15) - 套餐價：$25
• 煙肉芝士卷($12) 加 芝麻糊($15) - 套餐價：$20
• 煎臘味蘿蔔糕 - $13
• 炸麻辣雞翼 - $15
• 找數共銀 $73 ，兩人食，夠飽，價錢合理。

先講米線，menu寫係「自製豆漿麻辣湯底」，有大中小辣比你選擇，我怕頂唔住，叫咗小辣，米線一到，先飲啖湯，唔辣嘅，但幾ok，下次我估叫中或大辣都冇問題，餸及配料唔多，豬軟骨好爽有咬口，整體味道同長沙灣間四川麻辣米線幾相似，冇咁『麻辣』，甜啲，芽菜同腐竹就比四川少，但係好味道嘅。

麻辣雞翼，即炸，皮脆，肉質嫩滑，可能唔係煎嘅關係，皮冇燶味嘅，正！唯一係覺得再辣啲就更正。

煙肉芝士卷，食落啖啖肉加上芝士，好滿足。

蘿蔔糕，店員話係自製嘅，煎得唔燶，喜歡食茶樓蒸蘿蔔糕嘅要試下。但如果你喜歡食煎得燶啲脆啲嘅就唔駛叫嘞，夾落幾易散，同行友人覺得一般，我就幾喜歡食嘞。

最後上埋兩碗糖水，味道都係唔太甜，喳咋特別足料，唔喜歡食太甜嘅朋友應該會覺得ok嘅。

總括我覺得全部所點嘅食物都有一定水準，價錢又唔貴，但由坐低到埋單，店員都冇放低一杯水或茶，但我必定會再去光顧的。

孖生兄弟？

左圖係 Melody 個朋友 KUROMI 君，中間嗰幅係星爺早年在電影漫畫威龍中嘅造型，今日無意中行入某精品店，赫然比我發現原來 KUROMI 君 戴上太陽眼鏡 (右圖)，同周星馳竟有九成相似............你哋認為呢？