赤臘角觀景山

3月23日，星期日，上咗觀景山欣賞機場全景，之後再去參觀古窯及古物園，如要行畢全程，來回都唔需要兩小時，我當然慢慢行慢慢欣賞啦，都係用咗三個多小時咋，有空抽少少時間去睇下吖，都OK，係多蚊啲，喜歡嘅話約埋我去多次都隨時奉陪。

觀看照片請按 此連結

東涌至大澳 (二)

3月21日，由東涌出發步行往大澳，如有跟開梁太文章嘅，應該記得半年前我曾經行過此段路 (重溫請按此連結)，而今次再去係基於兩個原因：

• 1. 上次尾段因天黑趕路，根本未睇清此段路的風景；
• 2. 港珠澳大橋已拍板興建，此處將會被改變........

路程同上次相若，所以不多加叙述，同上次唔同嘅，係在深屈繞過象山到大澳一段時候，發現全個山頭被燒到光脫脫..........黑晒！

仲有上次行咗4小時15分，而我今次就放慢晒腳步，結果足足行咗6個幾鐘。

照片連結 請按此

夜景試拍

呢排學人玩下攝影，啱啱喺東涌試拍夜景，貼比大家睇睇吖。

大埔海濱公園

08年3月15日攝

佔地22公頃，位於大埔的大埔海濱公園，每日開放時間為朝七晚七，係目前香港面積最大嘅公園，設施包括單車徑、餐廳、小食亭、西式花園、自然生態花園、大草地、昆蟲屋等等，單係海濱長廊已經長1,200米，而最有代表性相信係高32米的香港回歸紀念塔，原來當年英軍接管新界的淪陷時期，就係在回歸塔位置登陸，於是香港政府便在1997年建回歸塔以紀念香港主權移交這重要時刻，而該塔更有周南先生提字。

在這麼大的公園，好容易就可讓你閒度一整天，就我所見，來聚天倫樂的、攝影的、放風爭的、踏單車的、釣魚的、放狗的、觀光的比比皆是，有時間的話，要去行下呀。

鳳凰日出探路 - 星華篇

上星期六，3月15日，星星同華仔為鳳凰日出之旅作先頭部隊，先在日間探路，喺度我謹代表梁太之友多謝兩位嘅貢獻！多謝！

以下係轉貼自華仔今次嘅感想：
『當日天氣晴朗 , 非常適合行山 , 起初由伯公拗上山都比較易行, 不過越行難道就越高 , 特別係過左第一個涼亭向鳳凰山進發一段 , 山坡越來越斜 , 地上佈滿碎石 , 梯級亦都比較大級 , 加上兩邊無大石作借力之用 , 行起黎比較吃力 , 而且亦有d 危險....雖然比較艱辛 , 但沿途風景優美 ,大約兩個鐘上到鳳凰山 , 上到鳳凰山頂更是一覽無為, 非常吸引..
落山方面 , 由鳳凰山向昂坪方向落山條路亦唔容易 , 大部份都係石級 , 而且亦都係比較斜 , 要小心慢行 , 否則亦都好易出意外 , 直至要去到 '心經簡林' 先可以舒一口氣..
由上山至落山 , 全程我同猩猩大概用左 3 個半鐘完成 , 兩人都覺得比較吃力 , 沿途無任何廁所或水源..』


星星之照片連結 請按此
華仔之照片連結 請按此

08年維園花展

3月14日，一年一度花展又開始喺維園舉行嘞，今年係我第一年去，同行有三個已經去過嘅小鴻、水爺同阿威，我去嘅原因當然係跟三位高手學下攝影技術啦，尋日我係最遲到嗰個，都影咗3個鐘先走，有好多種類好多唔同國家嘅品種，連非洲都有......我估我都睇漏咗好多好多，入場只需 HK$14，買本場刊都係 HK$15 (我冇買)，其實幾值得去睇下，不過佢哋話今年啲花比往年快凋謝，唔知係咪同天氣有關呢？

欲觀看小馮照片連結 請按此
欲觀看水爺照片連結 請按此
欲觀看阿威照片連結 請按此
欲觀看小鴻照片連結 請按此
欲觀看美美照片連結 請按此

籮箕灣之旅

籮箕灣之旅今日順利進行，早上10:15分由東涌出發，途經：

水口村→籮箕灣→石欖洲→東灣→紅十字會石壁營→雷紋古石刻→石壁水塘→東涌下領皮→東涌炮台。

下午17:30分完成整個旅程，共有 21 位團友參加。
今次旅程尚算輕鬆易行，有山景、海景，天氣比想像中熱一點，而今天我的記趣有：

1. 可跟廿位團友一齊遊山玩水，心情真係十分興奮，當中有幾位仲係第一次參加梁太遊樂團，梁太之友歡迎你哋啊。
2. 其實今日仲有一位團友即場加入，佢係一頭唐狗，我哋唔知佢叫咩名，幫佢改咗個，叫拍九，拍九陪伴我哋行咗足足3/4旅程，團友最後見到拍九係喺紅十字會，之後就離咗隊嘞，佢好乖、好活潑。
3. 經雷sir介紹，認識咗兩種植物，分別係鐡芒箕(蕨類)同崗松，多謝雷sir。(後補資料：雷sir於留言再介紹蓖麻，有興趣要去睇下啊)
4. 原來隊長係有短暫思覺失調嘅，是緣今日佢問我『跟住去邊度？』，我答『去石刻.....』，佢就因為太肚餓關係而失調，並回應：『去食蝦？』..........
5. 另外我發現流浪狗係唔飲蒸餾水嘅，因為當我見拍九口渴，比啲蒸餾水佢飲嘅時候，佢係愈叫愈走嘅。

最後今次要鳴謝嘅係，各位團友嘅積極參與，雖然今次旅程編排上有些混亂，多謝各位耐心忍受，希望下次會辦得再好一啲，今天如有招呼不週，各位千祈唔好介意喎，請繼續支持梁太遊樂團。

欲觀看小馮照片請按 此連結
欲觀看咖哩照片請按 此連結一 、 連結二 、連結三
欲觀看邦邦照片請按 此連結
欲觀看水爺照片請按 此連結
欲觀看星星照片請按 此連結
欲觀看癲豆照片請按 此連結