2007年11月13日星期二
海水魚家族成員
養水踏入6星期，水質數據開始有起色嘞，估計兩星期內就成功，現在為大家介紹下現有成員，仲個個都改咗名。
青B - 10月3日入住，開缸功臣，最初為爭地盤都會打魚，養落覺得佢好好"人"，因為佢唔單只唔打魚，有新魚入住，佢重會保護新魚，性格一流！
黃B - 10月6日入住，一落缸翌日就狂打魚，有新魚就當新玩具狂追，曾經係缸中大佬，不過已經被朱仔打巢咗，講真個格幾衰，不過都係開缸功臣，冇功都有勞。
左邊紅腳(15-OCT)，右邊藍腳(12-OCT)，兩個老友鬼鬼，紅腳喜亂衝，藍腳冷靜有智慧，佢哋主要負責缸中清潔工作，好勤力。
輝仔 - 10月28日入住，翌日即開口，佢就十分為食，大部份魚糧比佢搶晒，個肚食到漲卜卜都仲不停食，同青B最老友，而家我叫佢做肥輝。
上面大寶、下面二寶，同時在10月28日入住，兩位專責清理缸中藻類，幾勤力，但可能啲藻都生得幾快，佢兩個食完一邊，另一邊又爆晒藻，現正考慮買多幾個幫佢哋分擔下。
思琦 - 11月6日入住，係而家缸中體型最大嘅，唔會點打魚，但又冇魚蝦到佢，但係十分怕醜，魚缸外一有風吹草動，就第一個走人，所以影得唔夠清楚。
朱仔 - 11月8日入住，體型最細，最初十分擔心佢會比黃B打，誰不知原來佢天不怕地不怕，只用了一個晚上，就將黃B打到貼貼服服，而且仲霸晒佢所有地盤，另外朱仔十分敏捷，冇時停嘅，上圖已經係影得最清楚的相，請多多包涵。
訂閱：
文章 (Atom)
Since 27 APR , 2007
