水與魚兒的對話

今日睇了一些汶川大地震的照片，其中一幅並非真實照片，而是一幅手繪畫。

畫中畫了一個小女孩，手持一枝亮起的蠟燭，緊閉雙眼，淚在淌，腮子更是佈滿紅筋 ...

此畫主題：『我們在一起』

主題上寫有一個故事，故事是這樣的：

魚兒對水說：『你看不見我眼中的淚，因為我在水中。』
水對魚兒說：『我能感覺到你的淚，因為你在我心中。』

睇完覺得好感動，所以希望跟大家分享分享。

七八月博覽館好介紹

Thomas & Friends Live! On Stage - 友愛互助奇遇記
7月10日 至 13日，首兩天每日兩場，尾兩天每日三場。


AKON Live in Hong Kong - 7月26日舉行


Alicia Keys As I Am Hong Kong 2008 - 7月29日舉行


Travis Live In Hong Kong - 7月31日舉行


Live N'Loud Hong Kong 2008
呢個要介紹下嘞：
　號 稱 香港 首 個 搖 滾 音 樂 節 的 LIVE N'LOUD ， 將 於 8 月 5 日 假 亞 洲 博 覽 館 舉 行 ， Simple Plan 、 One Republic 、 Lostprophets 、 New Found Glory 以 及 Jamie Scott & the Town 5 隊 搖 滾 勁 旅 將 聚 首 一 堂 rock 足 一 夜 ， 除 了 台 上 的 精 采 演 出 ， 音 樂 節 場 館 內 並 會 舉 行 各 式 各 樣 的 活 動 ， 包 括 發 售 官 方紀 念 品 、 Channel[V] 及 HMV 特 設 攤 位 等 。 為 關 注 四 川 地 震 災 情 ， 主 辦 機 構 將 在 每張 門 票 中 捐 出 $50 作 賑 災 之 用 。

仲有濱崎步肯定9月會嚟、傳聞麥當娜都會嚟香港(唔知係咪博覽館呢？)，今次報導到此為止！大家剩係睇到啲陣容都應該夠晒興奮啦！

物價

今日去檀島食個晏晝，坐隔離有一大班人正在午餐，八八卦卦聽下佢哋講咩，見有一位剛剛到步嘅女仕問一位已攞餐嘅男仕：

女： 咦！？做咩食五香肉丁麵呀？唔食餐肉？你唔係鍾意食餐肉嘅咩？
男： 抵啲吖嘛！而家五香肉丁成十幾蚊罐呀！

係喎！呢件事令我諗起，早幾日喺超市見到而家五香肉丁買成$16蚊罐呀！有冇攪錯呀？以前平民價$10蚊有兩罐，而家咩世界...究竟係成本貴咗？定係商家牟利重咗呢？人工又唔見加得多，唔通營商真係咁艱難？

講開檀島，順便發下嘮騷先，記得此店於機場開幕早期，合桃蛋糕同藍莓芝士包好食到不得了，不知何時開始，藍莓芝士包得番極少芝士，而合桃蛋糕比我嘅感覺係偷工減料咗，冇晒嗰隻正正蛋糕味，合桃直頭係轉咗供應商咁，整個蛋糕完全唔掂，我最初以為一時失手，之後我比咗三次機會佢，結果完全一樣，唔通又係百物騰貴嘅關係？

** 註：以上純屬個人意見，如你是檀島Fans，請多多見諒。**

樂香園咖啡室

位於中環威靈頓街的蛇竇，多年前我已經光顧，因早已不在中環上班，已很久沒有幫襯，今年有機會再到樂香園，當然食回我以往最愛食嘅雞批，雞批內有火腿及雞肉，再用忌廉湯煮成餡料混合而成，如果撞正剛剛出爐，真真美味無窮，都係買6蚊咋！
咖啡、奶茶、鴛鴦亦十分到家，熱嘅$13、凍嘅$15，略略貴咗少少，不過中環喎，差唔多啦。
店內裝修、擺設偏懷舊，連沙糖都放置在一個冇蓋嘅器皿上，感覺上有點不衛生，但舊式亦係呢度嘅風味之一呀，至於點解叫蛇竇呢？有一個說法話以往好多打工仔經常光顧及蛇王一返，真係信不信由你嘞。
講出嚟自己都唔信，一直以來，我到蛇竇只會飲杯熱鴛鴦加個雞批，而對上一次，有啲唔夠喉，於是叫咗件蛋撻，嘩！真係咪亂試呀，各位。
另外近排返查過蛇竇嘅資料，原來除雞批、什批外，炒滑蛋同蛋治都十分有名的，下次光顧必試蛋治，而且唔會烘底，因聽講話個方包都好得嘅咁話。