滿月喇！

不知不覺我呢個梁太網誌已經一個月喇，點擊率竟然超過二千，呢個數字可能對閣下冇乜意義，但我就為此而十分興奮，因為根本冇諗過會有好多人睇嘅，都係多得你嘅支持！多謝晒！希望各位繼續多多嚟瀏覽本站，最好梗係多啲發表你/妳嘅意見啦，不過如你剩係睇.....我都已經高興萬分嘞，容許我再一次喺度同大家講聲：

多謝大家支持，多謝晒！

磨刀剪

之前講過飛機欖伯伯，令我諗起另一個行業......磨刀剪，如果你喺屋村長大，應該記得以前磨刀剪嗰啲師父係拎住舊磨刀石上樓、上門幫你磨嘅，又係好似飛機欖咁，一嚟到屋村樓下就喺度嗌：「磨.....刀......較X！」或者「磨.....較剪.....X！」
大家有冇奇怪我點解會打咗"X"字呢，係特登嘅，因為唔知點解，啲師父次次嗌親都係前面嗰啲字會好大聲，跟住最後隻字梗係好似屈喺喉嚨咁，要你用耳仔貼住佢個咀先聽到嘅，莫非行規乎？
請問有冇高人解釋到比我聽呢？

老闆絕句

尋晚睇報紙，講一個網上討論區嘅題目「上司鬧(串)下屬嘅絕句」，當中有句，真係好絕：

有一位人兄一次完成一個任務，仲幾好成績，但佢上司同佢講『一個停咗嘅鐘，每日最少會啱兩次』..................................

呢位老闆真掂！

貼身保安系統

• 女仕們要好好保管密碼；
• 男仕們要好好學懂解碼。

Feel Good INC.

GORILLAZ 約兩年前作品，好正！

蝦哥囡囡

友情連結中加咗條 link，『蝦女成長路』，相信大家都知係邊位個千金嘞，得閒去睇下呢個出世重9.9磅嘅巨B啦。
另外亦喺度恭喜蝦生蝦太弄瓦之喜，祝囡囡健健康康，快高長大讀書叻。

錦華粥粉麵

今日繼續大埔覓食之旅，走入綜合大樓熟食中心，經過錦華，一貌似老闆娘嘅中年女仕向我喊道：「坐，睇下食咩，好食嘅喎！」就係咁，我就真係乖乖咁坐低嘞........

1. 免治牛肉粥 --- $12
2. 芽菜炒米粉 --- $ 6
3. 鮮蝦腸粉 ------ $12

以上就係我今日點嘅「菜式」：

• 先講碎牛粥，牛肉幾夠味，比較撈得少炸米，味精唔少，但就似足以前街市、大排檔嘅粥品，碎牛嚟講算係幾好嘞；
• 炒米粉，普普通通，但一定唔難食，反而想講係佢哋好細心，米粉比客人前，會先落鑊返炒先上碟，熱辣辣比你食，抵讚，仲有，佢哋嘅辣椒醬好獨特，叫做幾辣嘅，有啲酸酸哋咁，都辣得幾過癮；
• 鮮蝦腸粉，最好食係呢個，即叫即做，蝦新鮮，但梗冇酒樓嗰啲咁大隻，腸粉好滑好滑，好好食，嚟到記得必食腸粉，正正正！

因為我嗌咗兩碗碎牛(兩人食)，找數共銀 $42，唔貴，可能係食粥嘅關係，唔夠飽，臨走同老闆娘吹咗兩句，問佢餐牌上有個叫『春風得意腸粉』係咩嚟？佢就話我知今日已經買晒，而個做法係用廣東春卷皮包住啲齋拎去炸，炸完再用腸粉包住完成咗嘅齋春卷，好脆口咁話，唔........下次要早啲嚟試下先得。