兩個月的珊瑚魚

掉低咗梁太咁耐，都係因為呢缸珊瑚魚，不知不覺，已經兩個月，水質雖未最好，但都可以加入多啲生物嘞，為大家介紹下新成員啦：

卡卡，11月15日入住，巴西籍法國神仙，見佢斯斯文文，成個巴西球星卡卡咁，因而命名，而家全缸最大條係佢。

小明，之前話想入多隻食藻螺，終於11月15日入咗，左邊幅相係比大家睇下佢大隻過大寶有幾多，點解佢叫小明？冇得解，大哥叫大寶、二哥叫二寶、排第三唔一定叫三寶嘅。

醫神，11月15日入住，職責幫魚魚們食寄生蟲，不過佢食魚糧多啲.........

姑姑，11月23日入住，氣泡菇，係軟珊瑚嚟，時時唔同型態，都幾過癮。

檸檬，11月24日報到，檸檬批，屬於神仙類，顏色好靚，鬼咁活躍，亂衝亂撞，有少少神經質。

醫生蝦，11月26日入，買佢係因為醫生掛住食魚糧唔做嘢，佢就勤力好多嘞。

橙鈕扣，11月26日入，買入後都未開已經被檸檬狂啄，我怕佢遲早玩完會影響水質，於12月3日掉咗，當時係未死嘅，而右面張相係毛蟹一隻，佢原本係住喺橙鈕扣入面(放咗幾日先發現佢)，而家已搬咗去紅珊瑚嘞。

豬腰，都係珊瑚嚟，11月28日入，一放入缸就即開，可惜近日發覺蟹同蝦都有攪佢，真係唔知佢可以捱得幾耐........


七仔，11月30日入，灰仙嚟，個樣同卡卡好似，唔同種兼細好多，但佢好慘，一入缸比卡卡打到七彩，最終都捱唔到，尋日朝死咗，好傷心.......唔知點解卡卡係打佢打得特別狠。