2008年5月31日星期六

兩頭龜



原來除兩頭蛇之外,連兩頭龜都有......

究竟有幾多呢?

2008年5月30日星期五

08年度足球隊隊名公投

各位,一年一度公司足球比賽又就到嘞,今年搵咗七個選擇比大家,現已將投票箱放置於網頁之右上角,每人限投一票,並於6月15日截止投票,只要你係梁太之友就有權投票,齊齊幫我哋球隊投返個好名吖。



註:選擇球隊後請按 "Add my Vote!" 確認選擇。

2008年5月29日星期四

多謝大家關心

相信大家都知我今日射咗波,冇上堂,收到不少好友都聲SMS問候,多謝各位關心,但喺電話又不能詳細解釋我咩事,所以借梁太話比大家知:

其實在這半年內,發覺食嘢時不甚暢順,有時更有些哽塞,尤其是食一啲較難消化嘅嘢,而近呢兩個月更有愈來愈嚴重的感覺,所以趁自己放三日假期就走去睇醫生check清楚。

26-05-08 先睇普通科醫生,經轉介28-05-08到中環睇外科;
27-05-08 同黑鬼葉上鳳凰山山頂,正!
28-05-08 十一點去中環睇外科,足足做咗五個測試:
  • 1. 麻醉照內窺鏡;
  • 2. X光照肺;
  • 3. 電腦掃瞄;
  • 4. 灌槳X光照食道及胃;
  • 5. 灌槳X光照腸。
分兩間診所做,做完晒所有測試都已經下晝五點,最慘係做測試前已經成十幾個鐘頭冇食嘢,計埋做完測試成20個鐘冇嘢落過肚,於是走去食碗雲吞面,唔知係咪落過麻醉藥,完全食唔落,一直到夜晚10點都食唔到嘢,個身又攰,冇辦法,唯有今日射波(醫生一早已吩咐及寫咗要休息),好彩有射,因朝早仲未完全食到嘢,直到夜晚嗰餐先正常返。

暫時只知道有幽門螺旋菌,其他報告要等下星期二覆診先知結果嘞,冇事嘅,各位請放心。

2008年5月27日星期二

鳳凰之顛 - 黑葉伴遊篇



鳳凰山:
山有兩峰,主峰(鳳)高934米,副峰(凰)高900米,是香港第二高山。其形如鳳凰展翅。遠望山頭崩爛,又稱爛頭山,英文名稱 Lantau Peak 由此而來,另因似雛鴉待哺,故又名鴉雀口山。

今日雖然無落雨,但密雲,一早起床,思前想後,終於等到11點半都忍不住要致電黑鬼葉,到鳳凰山一遊!全程共用了3小時,而行程如下:

伯公坳 → 牛塘坳 → 南天門 → 鳳凰山頂 → 天梯 → 心經簡林 → 昂平

此路段乃鳳凰徑第三段,全長4.5公里,由東涌坐車到達伯公坳入口,對對手錶 - 13:50,出發!最初一段,有點似曾相識,與往大東山路段頗相似,一路往上...一路往上,好快就到了紀念牌匾,心裡想,都不太難行,但一路行,上斜、落斜、再上斜,發覺要上山頂,真真唔係一件易事......當到達牛塘坳的涼亭休息時,翻開地圖睇睇,正!最辛苦嗰段已過!當然又估錯啦,難度只有增而無減,繼續要上石級、碎石路、石級、碎石路,好不容易才到達南天門,不知是否之前已經消耗不少體力,我覺得由南天門上山頂是全程最辛苦的,15:45 我倆終於到達山頂,即大約用了兩小時,沿途風景十分美......如果我哋睇得到的話......點解咁講?因為今日密雲,整段旅程都被濃霧包圍,能見度最差時,連前路10米內都不能看見,上面貼的照片都係咁啱喺濃霧中看見遠景時火速拍低的,講返到達鳳凰山之顛,心情真的莫名興奮,好開心好開心,終於征服咗鳳凰山,終於都到達山頂喇!正!感覺非常正!

鳳凰山頂,比我想像細得多,有一個避風亭,我入過,其實都好大風.......我們逗留了約15分鐘,落山往昂平,從山頂起點觀看此路段,好恐怖,感覺好危險,因濃霧關係,石級頗濕滑,和黑鬼葉商量後,決定不走回頭路,繼續由此路往昂平去也,此路名為天梯,翻查紀錄原來共有約1200級,石級頗為大級(如要由下而上,有些石級大概要提腿至心口位置),沿途有些路段設有欄杆,有些郤沒有,此段比我感覺頗為危險,行了大約50多分鐘便到達了心經簡林,但落大石級、濕滑、因危險而步步為營、落山令雙腿尤其是令膝頭承受不少壓力、再加上肚仔開始餓,呢50幾分鐘,足足好似行咗個半鐘一樣!

到達昂平即往茶園醫肚,點知已收檔!唔係掛,5點幾就收檔?好彩在天梯途中有停低,每人食咗兩片排包,諗返呢兩片排包真係好好味道,可能我哋真係好肚餓......到達昂平巴士站,我哋都八八卦卦抬頭望望天壇大佛......都係睇唔到,只見梯級,梯級頂只係白朦朦一片,你話有幾大霧呢?

觀看 小馮 照片連結 請按此
觀看 鳳凰山 星華篇 請按此

總結:雖然濃霧,美景欠奉,但能登頂仍是十分興奮的,此路段比大東山及釣魚翁辛苦,但相對於大東往南山一段,又比較安全,所以我覺得如果要睇日出,由伯公坳上大東山較為合適,睇完日出後再由原路回伯公坳坐車返東涌較為安全。

另外要多謝黑鬼葉肯陪我呢個癲佬上鳳凰山,多謝你!
AddThis Social Bookmark Button
AddThis Feed Button

代客張貼服務

將你想發表的內容及網名Email到airjcc.learnthai@blogger.com 便可代為張貼閣下的文章於本網站。(更多說明請參閱標籤中的網頁功能)
Palacan!部落格聯播

Since 27 APR , 2007

Blog Flux Directory