只要有夢想

尋日，喺報紙見到韓國電器生產商LG計劃生產一款擁有MP3功能嘅洗衣機，跟同事傾過，有啲意見係：「連MP3！？要嚟做咩？」
今日，當我搭巴士瞌緊眼瞓突然想起多年前嘅電視廣告..............『只要有夢想，凡事可成真』，呢句說話確實幾有道理，試想下以前大家有冇想像過電話可以拎住週街傾？電話可以影埋相？微波爐同雪櫃可以上網？上網嚟做咩呢？寄信唔駛貼郵票寄出去？車有咩理由唔係用真馬............
其實我真係十分佩服那些將自己幻想、夢想講出嚟嘅人，最初可能係不設實際，但係又有邊個知道日後你嘅小小『幻想』可能會被其他人實行後大大造福人群呢？
唔知幾時我沖涼房嗰四面牆會自動射水，取代花灑呢？我個花灑又幾時會連埋電話？塊鏡幾時會連埋電視？屋企鎖匙幾時可以連埋鬚刨？公廁第時會唔會連便利店連銀行連酒店.............................