別府(青衣城)

今日一知道青衣城購物滿HK$200可抽 903 id club 演唱會後，即去別府食番餐，坐低叫咗呢個二人餐，HK$238，用會員卡，先九折，後加一，找數HK$235.80，個餐都幾多嘢食，見下列：

• 蟹籽沙律：可接受，但就比嚐越差嘞。
• 三品刺身：三文魚、吞拿魚、玻璃蝦各兩件，用碗上，底部放滿冰，幾新鮮，個人比較喜歡蝦，夠大隻夠鮮甜。
• 蟹籽炸蝦卷：炸蝦味道與元氣炸蝦卷十分相似，分別係再加上飛魚子，幾好食。
• 鐡板迷你土佐豆腐：木魚炸豆腐，豆腐好滑，中間放咗啲明太子，辣辣地，幾惹味，好食嘅，不過勁多油。
• 天婦羅南瓜蕃薯：唔知係咪廚房攪錯咗，共四件南瓜及兩件茄子天婦羅，冇咗蕃薯呢樣嘢，南瓜OK，茄子就冇咩味嘞。
• 吉列廣島生蠔：即炸生蠔，外脆內軟，幾得喎。
• 松葉蟹膏海鮮炒飯：咪誤會，冇松葉蟹肉嘅，得少少蟹膏撈下啫，有啲尤魚、蝦、假魚蛋，普普通通咁啦。
• 麵豉湯：以前我唔鍾意飲，近幾年開始接受，仲幾喜歡飲，呢碗啲豆腐就好味道嘞。
• 甜品：綠茶雪糕OK，Tiramisu就唔多掂嘞。

有冇發覺圖片中多咗一款呢？冇錯，玻璃蝦刺身係送嘅，睇過餐牌，價值HK$38，我哋兩個人都食唔晒成個餐，最後食剩個海鮮炒飯，每人食咗一碗，有剩打包拎走，好飽呀。

另荃灣、青衣、東涌嘅別府我都光顧過，係東涌嗰間服務態度最差，其他兩間都幾好喎，照計應該都係越多客就越差(唔懮做)，我諗東涌別府真係要好好檢討下。