東涌日落

下晝接到小鴻電話，話今晚天色靚，有機會影到咸旦黃，雖然我部單鏡拎咗去整，但用富士都一樣，可惜去到嗰個地方個境咁啱比座大廈頂住......影唔到太陽伯伯較低嘅位置，又冇時間去過另一個地方，於是都影低先，影就影得差啲，都同大家分享下吖。

08 海水缸新舊成員

同大家介紹現在魚缸成員先：


黃B〈黃魔〉：07年10月6日入住，魚細細，喜歡蝦蝦霸霸，新魚進缸必是第一個撩事鬥非者，但往往最後被對方打到一扑一碌，雖然性格好差，但佢係開缸功臣唯一生還魚，替我熬過極差水質，做『白老鼠』，冇功都有勞，睇相未必睇得出，其實佢身型已經大咗好多喇。

紅腳〈寄居蟹〉：07年10月15日入住，相信大家都對佢有印象啦，換過好多次外殼，好貪靚，以前亂衝亂撞，而家唔會嘞，不過搬到我啲石頭貝殼亂晒籠，專責缸內清理魚兒吃剩嘅食物。

二寶〈食藻螺〉：07年10月28日入住，佢大佬大寶因之前一次缸中要落重藥而失去寶貴生命，而家剩返佢同佢細佬小明負責清潔缸中藻類事務，唔知有冇錯覺，睇返佢啲舊相，我都覺得佢大咗些少。


小明〈食藻螺〉：07年11月15日入住，身型比二寶大好多，清潔藻類亦較有效及勤力，可能身型關係，紅腳經常會擒上佢身上借力，最初仲以為紅腳攻擊佢，不過見慣原來冇嘢嘅。

古仔〈藍圈〉：08年4月10日入住，性格十分淡定，為缸中身型最大，成隻航空武艦咁，喺水中慢條斯理地巡航，雖則話佢淡定，但其實佢對眼經常射嚟射去，處事小心奕奕，蠱蠱惑惑，古仔之名，由此而來。

六仔〈藍仙〉：08年4月10日入住，現在缸中身型最細小，活潑非常，戰鬥力強，冇懼大魚攻擊，戰鬥到底，只要對方奠定咗佢嘅地位，佢又唔會不斷追殺，性格跟之前朱仔十分相似，但戰鬥力及耐力更強，雖然佢大過後體色會作出巨大改變，不過現時體色主要由黃色搭配藍色，黃加藍咪變綠囉，知道點解佢叫六仔啦。

歷穌〈白尾藍紋〉：08年4月10日入住，胆少，但又為食，每次全缸受嚇後遊返出嚟，佢都係最後一個現身的，但當餵食嘅時候，佢食嘢嘅速度同決心真係一絕，可以爭到大部份嘅糧食，個肚長期脹卜卜，叫歷穌係因為樣子十分似黑人。

Do Do〈檸檬批〉：08年4月21日入住，初入缸同黃B、六仔打餐死，最後比六仔臣服咗佢，而家個個見到佢都抽下佢水，趕下佢追下佢咁，入嚟兩星期都唔敢食嘢，好彩尋日見佢試下偷食嘢，希望佢捱到過去啦。

小藍腳〈寄居蟹〉：08年4月21日入住，替補大藍腳清潔員個位嘅，可能仲細，性格冇咁冷靜及聰明，到現時為止仲未見佢換過外殼，係成日跟住紅腳尾搵食，有幾次唔知係咪紅腳不甘被跟蹤，打到佢成個反轉晒。

醫生蝦：08年4月21日入住，本來有兩隻，一隻叫大蝦一隻叫細蝦，點知落缸兩日後有一隻已經不翼而飛，而家得返佢，主要職責幫魚魚清潔身體的。

新Dee〈法仙〉：08年4月27日入住，身型僅次於古仔，因為星期日帶佢返嚟，所以亦有此命名，可能此類魚生性大胆，養過幾條都係唔太驚人，入住冇耐已經到處遊兼懂得搵食，但佢而家尚未適應新水質，攪到啲鰭爛溶溶咁，成日要去搵醫生蝦幫手，希望新弟快啲好返啦。


個缸已經運作咗七個月，水質已較穩定，但因為缸細，不能加進太多魚兒，現在數目已經差不多，最多加多一尾小型魚，希望佢哋都快快樂樂喺度生活啦。

小藍腳

好耐冇同大家講下缸海水魚嘞，因為傷亡慘重，新年後差不多全缸覆沒，只剩下開缸功臣黃B同紅腳，但已入了幾尾新魚，並正健健康康的生活，包括此次主角：小藍腳。
片中故事係咁樣嘅：話說小藍腳闖進黃B地盤，被黃B攻擊，撞至反轉，究竟寄居蟹點樣反身，睇片自會明白，請留意片尾小藍腳反身後，因仍在黃B地盤範圍，黃B再對佢作出攻擊，你見佢個殼郁下郁下就係嘞。至於其他新魚情況，遲啲再比大家睇吖。

沙螺洞、鶴藪探路之旅

簡介：

沙螺洞，佔地逾80公頃，整個山谷被八仙嶺環抱。二、三十年前，居民以務農為生，稻田荒廢後被政府列為二級古蹟。由於地處高地，山谷河流不受污染，孕育出多種野生動物。據估計，這裡有百多種草藥品種，六百多種植物，百多種雀鳥，並曾發現野豬，果子狸等野生動物。河裡有多種淡水魚，更有稀有品種的蜻蜓和蝴蝶。

目的：
今次探路原因，主要因為側聞沙螺洞在往後幾個月可欣賞得到螢火蟲，小弟發現一個有機會觀賞到嘅地點，位置大概在『大炮亭』附近，如果大家都有興趣睇螢火蟲的話，請留言或聯絡華仔或我吖，時間容後再公佈。

今次探路行程：

大埔 → 沙螺洞 → 張屋 → 鶴藪家樂徑 → 鶴藪水塘 → 鶴藪排

尋日，原本已相約好殺手、小鴻及粉葛，一行四人到沙螺洞探路去也，點知等極個天都係落雨，一路都冇好轉跡象，到12:00左右仲收到小鴻來電，話九龍區行雷添，所以決定取消行程，同殺手及粉葛去食啲嘢然後解散，食完嘢後仍然落住微雨，殺手離開，我同粉葛心想都帶齊架生，喺中上環影一陣都好啦，誰不知影影下出太陽，於是兩兜友胆粗粗，照往沙螺洞去也。
15：20於沙螺洞路正式出發，到達大炮亭時間為17：05，但係我哋行下停下，相信如果剩去此點睇螢火蟲的話，約一小時即可到達。17：30 我們到達下一個景點：沙螺洞村，此村已經荒廢，但仍有惡犬把守，大家睇相時記緊留意一隻啡狗，長得十分似熊，此狗足以令我們不敢進村。18：20到達鶴藪水塘，景色好靚，可惜的是我們到達時已接近天黑，所以未有環塘一遊。行畢全程後，在鶴藪排乘坐52B專線小巴($4.8)到粉嶺完成整日行程。
回想今次呢條路線，初段上斜路到2百多米高地，跟住為一片綠草平原，再接就是石路落鶴藪水塘，全程用了4小時，輕鬆易走，唯需留意早及尾段十分多蚊，及落鶴藪的石路頗多青苔，因今次剛下完雨水，路面較為濕滑，我倆都步步為營，小小心心慢慢落山，另外，此處遠景、海景欠奉，主要係林景、山景同水塘，但昆蟲、蝴蝶、蛾、花、植物及雀鳥等等就多的是，本人覺得值得一遊。


觀看 本人 照片連結 請按此

觀看 粉葛 照片連結 請按此

南生圍

4月29日，三位攝影大師：小鴻、水爺及阿威出動前往南生圍，咁好機會，我當然跟埋去啦，而同行仲有拍七及華仔，不過逗留時間就比較短，最初天陰陰，好彩稍後天色逐漸放晴，因時間所限，未能行畢整個南生圍，有機會會再來欣賞另一半景色，以下係輯錄維基百科對南生圍的介紹：

『南生圍是位於香港新界元朗區橫洲東面的地方，被東面的錦田河及西面的山貝河所包圍。南生圍的「圍」就是基圍的意思，基圍主要飼養的就是基圍蝦。南生圍原本很多基圍、魚塘及農地的地方，而村民大多在塘邊架起小木屋居住。可是自20世紀90年代中，元朗急速發展，城市化之下南生圍亦不能倖免，以致大量魚塘及農地被荒廢。相似情況出現於同區的天水圍。
錦田河與山貝河的交匯處有個小島，猶如一個雀鳥天堂。因為水退時，小島泥灘旁有很多候鳥在停留，尤其是黑面琵鷺。
2003年11月初在南生圍曾出現小灣鱷，香港政府為了市民安全，聘請澳洲「鱷魚先生」約翰·利弗及番禺鱷魚專家「鱷魚釗」前來捕捉，引發市民的好奇心，使市民注意到南生圍這個地方。期後小灣鱷被命名為「貝貝」，並被送到香港濕地公園飼養並供遊覽人士觀賞。』

觀看 本人 照片連結 請按此

觀看 小鴻 照片連結 請按此 (同場加影南蓮、尖咀靚相)

觀看 水爺 照片連結 請按此

426 歡送宴

426 歡送宴已於昨晚假坐荔枝角富臨酒家順利舉行，此次主角分別是咪咪、茄墳、邦邦、星星及癲豆 (排名不分先後) ，今次除開開心心一起共進了一席豐富晚餐外，席中人位位真情流露，更有人感觸流淚，大家始終長達十年感情...... 酒席過後再到旺角把酒談天作樂，雖然本人未能出席，但相信氣氛定必十分感人，如可以的話，請出席者在意見板上留下當晚情況與閣下感受吖。在此我再恭祝五位主角一路順風，心想事成，一帆風順。

美 美 照片連結 請按此

星 星 照片連結 請按此

爸 乸 照片連結 請按此

大東山

大東山，高869米，為香港境內第三高峰，尋日早上觀察過天色，持續放晴，放工後決定相約星星仔一同往大東進發去也，今次行程：

伯公坳 → 大東山 → 繞二東山及雙東坳 → 南山郊野公園 → 嶼南道

2點33分到達伯公坳，開始旅程，而今次正正是鳳凰徑第二段，全長約6.5公里，一開始全程向山上，斜度一般，一直向上爬確需要一定體力，但每高一點，視野愈是遼闊，對望鳳凰山、遠眺分流、籮箕灣、索罟群島全景、石鼓洲、南丫島、長洲、喜靈洲、周公島、坪洲、交椅洲、香港島南面，通通盡收眼底，可惜昨日始終能見度偏低，如能見度高的話，相信就連遠至蒲苔島都可以見到。上到接近山頂，地勢開始偏於平坦，而風勢亦比較大，十分清涼，向前行了不久，望向遠方見十多間石屋，原來已經到達大東著名景點『爛頭營』，石屋群比我嘅感覺好似去咗荷蘭、丹麥咁，好有特色，但我們參觀了兩三間石屋後，天氣開始轉變，先是一片大霧由北面湧至，好壯觀，五分鐘內，180度由天晴轉為微雨，於是我們二人便決定要用較快速度下山去，沿途快快參觀石屋，影相也是急急的，過了爛頭營，進入二東山段，雨勢愈來愈大，我們連相機都要收起，連忙趕路，上山辛苦、而落山就危險，因為有些路段頗險峻，石面有青苔、地衣等，加上雨水後令石頭變得十分濕滑，沿路更滿佈碎石，真是稍有差池，後果不堪設想，當時又要擔心太慢落山，又會天黑，我同星星仔終於領會到，什麼叫做『千祈唔好急，但係要快』嘅道理............ ，6點13分，我們到達南山郊野公園嶼南道出口，完成今次旅程，全程共用上3小時40分，心情好興奮，唯落山一段全程皆被雨水、霧水籠罩，未能為大家拍下照片，實是可惜，但今次體驗對於我們兩人確是難得且難忘的。

而旅程當中有一些小插曲：

1. 明明知道前面有一隻『大鳥』，因逃避我倆而走入樹叢，又明知佢會無啦啦飛出嚟，但係當佢真係飛出嚟嘅時候，我哋都仍然『嘩』咗出嚟，嚇一嚇。
2. 路上遇上一條蜈蚣，雖然唔大條，但係佢紅色嘅部分係鮮紅色嘅，一般我見過嘅只係暗紅色的，呢條蜈蚣比我感覺佢好毒..............
3. 在南山的某段路上，當時星星正用行山竹篤吓篤吓之際，我見到有一條類似青竹蛇喺星星仔後面橫過，我當然大嗌話佢知叫佢急急繼續前行，我就等條蛇大哥完全離開，先夠胆行過，驚驚！

縱觀今次旅程，雖然辛苦，但好興奮、有體驗、有得着，多謝星星仔！

觀看 小馮 照片請按 此連結

觀看 星星 照片請按 此連結

** 資料補充：網上查過，原來爛頭營的由來有另一個說法，可到 此連結 睇睇，至於邊個係真，我就唔清楚嘞。至於當中18號石屋裡面的相片，則可往 此連結 **