生記粥品專家

幾年前，隊長帶我嚟呢間生記食嘢，記得當時我係叫咗碗清湯牛腩伊麵嘅，晤.......好味道！

之後，我就開始不時都嚟幫襯，在我第二次到訪時，我見到牆上除咗介紹清湯麵外，亦有介紹粥品，於是，就叫了一碗鮮牛肉粥試試，試過之後.......我每次嚟到生記都係食呢樣，不作他選嘞！

• 鮮牛肉粥 --- HK$20 (袖珍類)
• 鮮牛肉粥 --- HK$26 (單拼類)
• 清湯牛腩麵 ------ HK$18
• 清湯牛腩伊麵 --- HK$20

生記，位於上環，近孖沙街/禧利街，雖然上圖有兩間生記，其實兩間是靠在一起的，今日幫襯時，更發覺佢已經再擴充了舖位，門外亦貼上增加旺角分店的告示，恭喜恭喜，抵你嘅！

講返碗粥先，味精粥，粥底比以前稀咗，料好似冇咁足，但尤幸仍然係好味嘅，牛肉好鬆軟，好好咬口，最緊要係佢附帶嗰碗薑葱豉油，用嚟點牛肉，好味道呀！最衰我唔係好喜歡食魚，因為我一直覺得呢碗豉油點魚最正！如果你好魚的話，我建議你叫碗鮮鯇魚腩粥，應該好好味。

註：生記星期日休息，平日食晏時間十分多人，另如堂食12:30前離坐結賬或14:30後入座的話，每碗粥照價減HK$3，可以的話選擇呢啲時間去，食都食得舒服啲。