架車返嚟喇

我架老爺車繼早前冇電、漏軚油、嘔偈油後，早排又一新作：行駛途中自動死火，經典嘛？最初我以為係自己技術問題，點知情況越來越頻密，於是又再一次於6月4日送佢入廠，師父睇過後發現某地方滲漏偈油，換過啲油氈、揸口，應該好快攪掂，誰不知師父拆拆裝裝，裝裝拆拆，越整越唔妥，搵嚟搵去唔知邊到渗漏，如是者一日一日咁過去............
上星期我再致電師父說：『算喇，如果攪唔到就唔好整喇，架車本身唔係貴，我唔會比太多錢出嚟整，你交返架車比我啦。』
修車師父答道：『架車令我好頭痕，我拆裝完，踩一轉佢又漏，已經又拆開晒嘞，而家已經唔係錢嘅問題，冇理由攪唔掂嘅！』
我說：『據你所講即係唔止之前你所講嘅問題啦，如要加太多錢，我係唔會比架喎，唔好整啦。』
師父：『加幾舊......唔會加得好多，主要係比手工......』
我：『加幾舊整得返又冇所謂，你玩下啦，唔掂出聲呀！』

呢件事我覺得師父一係驚整唔掂冇錢收，一係真係比我架老爺車激起咗佢嘅鬥志............

終於，尋晚車房來電話話今晚攞得車嘞，間車房星期六、日、公眾假期唔辦公，扣減晒啲假期，足足整咗兩星期.............架車係咪真係整返好？試返一排話你哋知啦。