和暢粥麵專家

-------炸雲吞------------客家肉丸粥--------和暢粥麵專家----

今日去大埔食晚飯，原本去世記食豬扖，點知原來好早收，於是去咗大明里間和暢，因為之前睇過下某報導對呢間有啲好評，所以去試下，一行兩丁友，叫咗三樣嘢，分別係：客家肉丸粥($18)、炸雲吞($15)、雲吞河粉($16)。

記得報導話『此店以新鮮，不加味精見稱』

先評肉丸粥，比一般粥店大碗，肉丸五粒，唔覺有味精，粥唔夠綿，但都OK，三樣中最好食嘅。

炸雲吞，有八粒，脆，但就細粒啲，雲吞肉嘅比重較多，冇咗食鮮蝦嘅口感，仲有舊油炸嘢嘅油益味，但唔難食，只提供沙律醬，如果有甜豉油就好嘞。

雲吞河粉，雲吞有六粒，我冇份食，但飲過一啖湯，晤..........果然係不加味精.........冇味嘅，友人於是加辣椒油，誰不知........唔辣嘅，友人評語：唔好食。

總結：想少味精嘅可以試一試，見人哋碟椒鹽排骨($15)好似幾得，地方亦算乾淨，如果你試到邊樣好食嘅話返我知啦。